Ish-deputeti socialist, Taulant Dedja, përmes një postimi në rrjetet sociale shprehet hapur në mbështetje të manifestimit të 2 marsit, që është thirrur nga Presidenti Ilir Meta nën moton e mbrojtjes së Kushtetutës.
I ndodhur prej vitesh në Kanada, Dedja shprehet i zhgënjyer nga Partia Socialiste, ndërsa thekson se forca politike për të cilin kontribuoi “nuk ekziston më”.
“Partia për të cilën kontribuova nuk ekziston më, kështu që çka mbetur prej saj nuk më intereson fare. Rilindja ka kohë që ka vdekur, por meqënëse anëtarëve të saj nuk u pëlqejnë as traditat, as zakonet e asgjë që i përket kulturës e trashëgimisë kombëtare ajo nuk di as të njohë e as të mbajë zi”, shkruan Dedja.
Ish-deputeti shprehet se qytetarët shqiptarë janë ata që kanë në dorë fatin e vendit të tyre.
“Prandaj na mbetet ne qytetarëve t’u tregojmë rilindasve se Rilindja ka vdekur. Le t’ua tregojmë këtë më 2 Mars në manifestimin që Presidenti i Republikës Ilir Meta ka thërritur në emër të mbrojtjes së Kushtetutës, themelit të shtetit”, shkruan ish-deputeti socialist.
Taulant Dedja ka qenë një ndër figurat qendrore në PS, ndërsa ka mbajtur edhe postin e Prefektit të Tiranës apo zv.ministrit të Pushtetit Lokal.
