Marrëdhënia e Neymar-it me skuadrën e Barcelonës të thuash është e çuditshme është pak. Nga njëra anë dëshira e lojtarit për tu rikthyer në “Camp Nou”, është bërë e ditur disa herë, nga ana tjetër midis palëve ekzistojnë mosmarrëveshje për sa i përket kontratave.
Së fundmi sipas, “El Mundo Deportivo”, Neymar e ka hedhur sërish në gjyq klubin “blaugrana”, duke pretenduar se i detyrohet 6.5 milionë euro, shumë që i është dashur ta paguajë në formë taksash nga kontrata e blerjes së tij nga Santosi në vitin 2013. Thelbi i kërkesës së Neymarit konsiston në faktin se taksimi i të ardhurave (nga transferimi) ndryshoi kur u konsideruan si pagë.
Gjithsesi, Barcelona nuk ka ndërmend ta paguajë këtë shumë (6.5 milionë euro) dhe apo të kundërpërgjigjet me një tjetër akuzë në një seri gjyqesh që duket sikur nuk do të kenë fund.
Kjo është hera e tretë që Neymar hedh në gjyq Barcelonën, duke pretenduar prej klubit që e solli në Europë një shumë totale prej 38.6 milionë eurosh.
