Kryeministri Edi Rama mesa duket nuk ndahet dot nga e shkuara e tij komuniste. Ndërsa mbante fjalën e tij para grave socialiste, ai kërkoi që të hiqeshin termat zotëri dhe zonjë dhe ato të zëvendësoheshin me shokë dhe shoqe, njësoj si në pleniumet e Partisë së Punës.
Edhe pse nuk pati asnjë reagim nga ana e tij pas vdekjes së Nexhmije Hoxhës dy ditë më parë, Rama duket se ka zgjedhur rikthimin e termave komunistë në nderim të shoqes Nexhi.
“Dhe e fundit që kam, ka vetëm një gjë që nuk shkon në Kongreset tona. Nuk shkon të më thoni më Zoti Rama, aman ma hiqni këtë se më duket tmerr. Është dhe ky një zhvillim i jetës sonë sepse njëherë e një kohë i thosha Gramozit- z.Gramoz dhe ai më thoshte shoku Edi. Tani ai me thotë z.Edi dhe unë i them shoku Gramoz. Tani Gramozi është shoku im më i ngushtë. Plotëson boshllëqet e mia. Hiqeni këtë zonja dhe zotërinj, se si do i thoni gjejeni vetë. Ajo e shoqe Besës më pëlqeu. Kështu që të dashura shoqe, ju përulem,”-tha Rama në fjalën e tij para socialistëve.
