Nesër në orën 19:00, luhet derbi i kryeqytetit mes Tiranës dhe Partizanit. Për të folur në prag të kësaj supersfide, në konferencën për shtyp ka dalë trajneri i skuadrës Adolfo Sormani.
Në fjalën e tij Sormani është shprehur entuziast për këtë ndeshje, ndërsa ka theksuar se përgatitja për sfidën ka shkuar më së miri gjatë gjithë javës. 54-vjeçari gjithashtu ka folur me superlativa për Lorenc Trashin duke e cilësuar si mbrojtësin e majtë më të mirë të Ballkanit dhe gjithashtu shpreh keqardhjen për mungesën e tij në këtë sfidë pas dëmtimit që pësoi ndaj Bylisit.
Sormani preku dhe rikthimin në skuadër të Esat Malës, për të cilin thotë se është mirëpritur në skuadër dhe që fizikisht është i gatshëm për sfidën e nesërme.
“Kemi punuar fort dhe me entuziazëm gjatë kësaj jave, mendoj se do të japin gjithçka në fushën e lojës. Hyjmë gjithmonë për të fituar e për të dhënë gjithçka. Nuk kam asnjë presion si trajner, thjesht dua që ta fitojmë këtë ndeshje. Duket shumë e thjeshtë kjo frazë, por vërtet duhet fituar kjo ndeshje, për shumë arsye që nënkuptohen në këtë moment të kampionatit. Pikë së pari, dua fitore për të qenë aty, në garën për titullin. Skuadra është gati të bëjë më të mirën”.
“Trashi nuk do të luajë, më vjen vërtet keq. Që kur kam ardhur këtu, ai është përmirësuar shumë. Për mua është mbrojtësi i majtë më i mirë në të gjithë Ballkanin. E kam parë se si punon. Më vjen keq, duke ditur se mezi priste të luante në këtë ndeshje. Na ka kërkuar të fitojmë dhe do të bëjmë gjithçka që t’ia plotësojmë dëshirën”.
Mala në ekipin e parë? “Nuk luan që prej 10 dhjetorit me Partizanin që drejtoj, por është një lojtar, që nuk e ka problem formën fizike. Ka qenë mjaft pozitive mikpritja që skuadra i ka bërë ditën e djeshme. Është e rëndësishme që një i familjes i bashkohet skuadrës së parë. Ka cilësi mjaft të mira. Cilin veçoj nga Tirana? Njoh lojtarë si Torasa dhe Batha, që i kam stërvitur. I njoh si lojtarë dhe si njerëz. Gjëja më e rëndësishme është që stadiumi të jetë plot. Do të jetë një derbi i luftuar dhe spektakolar”.
