Këshilli i Lartë Gjyqësor ka përcaktuar 3 kandidatët për 6 vendet vakante në Gjykatën e Lartë. Në mbledhjen e djeshme, KLGJ vendosi vendosi hapjen e proçedurës së ngritjes në detyrë në Gjykatën e Lartë, nga radhët e gjyqtarëve për 6 pozicione të lira, 3 në fushën e të drejtës administrative dhe 3 në fushën e të drejtës civile.
Këshilli miratoi vendimet për vlerësimin dhe pikëzimin e kandidatëve Sokol Sadushaj, Ervin Pupe dhe Ilir Panda për në Gjykatën e Lartë që vijnë nga radhët e juristëve të spikatur, përkatësisht në fushat e të drejtës administrative, civile dhe penale.
Sadushaj është drejtori i Shkollës së Magjistraturës, i cili është akuzuar jo pak herë nga opozita për lidhje me mazhorancën. Katër vjet më parë, Berisha akuzonte Sadushajn se ka qenë ekspert në komisionin për sugjerimet për paketën ligjore për drejtësinë, se ka dashur vetë që të jetë në krye të Gjykatës Administrative. “Po shteti nuk mund të punojë për të bërë Sadushin kryetar të gjykatës Administrative”, deklaronte Berisha.
Ilir Panda, ka mbajtur postin e ministrit të Drejtësisë në periudhën 1999-2000, kohë kur PS ishte në qeverisjen e vendit, ndërsa nga 2003 në 2007 ishte zv.Kryetar i KLD-së, ndërkohë që President i vendit, i cili njëherësh ishte edhe Kryetar i KLD-së, ishte Alfred Moisiu.
Në njoftimin zyrtar thuhet se Këshilli i Lartë Gjyqësor, zhvilloi mbledhjen e radhës në të cilën miratoi disa vendime të rëndësishme me qëllim funksionalizimin e plotë dhe rifreskimin me energji të reja të Gjykatës së Lartë, të Gjykatës e Posaçme të Apelit për Korrupsionin dhe Krimin e Organizuar dhe asaj të Shkallës së Parë për Korrupsionin dhe Krimin e Organizuar.
“Këshilli i Lartë Gjyqësor, pas një pune voluminoze pothuajse 1 vjeçare në draftimin dhe miratimin e një sërë aktesh nënligjore ka plotësuar kuadrin normativ lidhur me proçesin e verifikimit të pasurisë dhe figurës edhe për kandidatët për në Gjykatën e Lartë, nga radhët e gjyqtarëve. Me miratimin e aktit të fundit nënligjor të ngritjes në detyrë të gjyqtarëve është plotësuar tërësisht kuadri ligjor, në zbatim të të cilit bëhet e mundur ndjekja e proçedurave për ngritjen në detyrë të gjyqtarëve në Gjykatën e Lartë dhe në Gjykatat e Posaçme.
Këshilli i Lartë Gjyqësor është angazhuar që të trajtojë me seriozitet dhe përgjegjësi çdo element të proçesit, deri në përzgjedhjen e kandidatëve për propozim për emërim tek Presidenti i Republikës.
Brenda 10 ditëve nga data e marrjes së vendimit të Keshillit të Lartë Gjyqësor, Presidenti i Republikës duhet të emërojë kandidatin e propozuar nga Këshilli. Nëse Presidenti refuzon emërimin, atëherë dekreti i refuzimit të kandidaturës përkatëse i kthehet Këshillit të Lartë Gjyqësor që me shumicë votash, vendos rrëzimin ose rivlerësimin e kandidatit.
Nëse Presidenti i Republikës nuk shprehet brenda 15 ditëve nga data e vendimit të Këshillit të Lartë Gjyqësor, atëherë kandidati shpallet i emëruar dhe fillon detyrën si anëtar i Gjykatës së Lartë”, thuhet në njoftimin e KLGJ.
Këshilli miratoi hapjen e proçedurës së ngritjes në detyrë për 5 pozicione të lira, në Gjykatën e Posaçme të Apelit për Korrupsionin dhe Krimin e Organizuar dhe 5 pozicione të lira, në Gjykatën e Shkallës së Parë për Korrupsionin dhe Krimin e Organizuar.
Në këto kushte, Këshilli i Lartë Gjyqësor, në ushtrim të përgjegjësisë për mbarëvajtjen e sistemit gjyqësor i hap rrugë promovimit të gjyqtarëve më profesionistë dhe me integritet të lartë në Gjykatat e Posaçme.
Këshilli i Lartë Gjyqësor miratoi vendimet për hapjen e proçedurës së komandimit nga radhët e gjyqtarëve për 6 pozicione inspektor, në zyrën e Inspektorit të Lartë të Drejtësisë, për 1 pozicion pedagog i brendshëm, në Shkollën e Magjistraturës dhe 2 pozicione në administratën e Ministrisë së Drejtësisë.
