Liverpool fitoi mbrëmjen e djeshme 3-2 me përmbysje kundër West Ham-it. Skuadra e drejtuar nga Jurgen Klopp, kryeson kampionatin me 22 pikë diferencë nga Manchester City i vendit të dytë.
Gjithsesi çështja e titullit nuk përbën më lajm, “të kuqtë” tani janë vënë pas disa prej rekordeve më të mëdha në Premier League, teksa në 27 ndeshje të luajtura janë ndalur vetëm në një barazim kundër Man.United.
Mbrëmjen e djeshme, Liverpool-i ka barazuar rekordin e fitoreve radhazi në kampionatin anglez (18), që mbahej pikërisht nga City, një rekord i vendosur në periudhën gusht-dhjetor 2017.
Suksesi ndaj West Ham shënoi edhe një rekord të ri në Premier League për ndeshjet e fituara radhazi në shtëpi (21).
Në ndeshjen e luajtur mbrëmjen e djeshme, West Ham kryesonte me rezultatin 1-2 deri në minutën e 67-të, por më pas Liverpool-i përmbysi gjithçka me golat e Salah dhe Mane-s në minutat 68’ dhe 81’.
