Presidenti Ilir Meta depoziton sot në SPAK kallzimin penal ndaj ministres së Drejtësisë, Etilda Gjonaj.
Zëdhënësi i Presidentit, Tedi Blushi, përmes rrjeteve sociale bëri të ditur se Kreu i Shtetit do të depozitojë sot personalisht në ora 13:00, në Prokurorinë e Posaçme SPAK, kallëzimin penal për Ministren në detyrë të Drejtësisë, Etilda Gjonaj dhe funksionarë të tjerë të lartë të përfshirë në veprimtari të rëndë kriminale, në funksion të grushtit të shtetit.
Pak ditë më parë, Meta u shpreh se Gjonaj, për llogari të qeverisë dhe në kundërshtim me ligjin, urdhëroi botimin në Fletoren Zyrtare të vendimit të KED për publimin e listës përfundimtare për vendin vakant të Gjykatën Kushtetuese. Lista e KED kryesohej nga Arta Vorpsin, emër jo i zgjedhur nga Meta, i cili në vend të saj preferoi Marsida Xhaferllari.
Meta i bëri apel Gjonajt që të japë dorëheqjen nga detyra e ministres për tu përballur me drejtësinë.
Për orvatjen me qëllim “kapjen e Gjykatës Kushtetuese”, siç e quan Meta, ai ka thirrur një tubim në Tiranë më 2 Mars. Meta madje deklaroi këtë të premte se mazhoranca po organizon “grusht shteti”, duke marrë në mënyrë antikushtetuese pushtetin që Kushtetuta ia jep Presidentit, me qëllim kapjen e Gjykatës Kushtetuese.
Lidhur me çështjen e Gjykatës Kushtetuese, pritet dhe një opinion i Komisionit të Venecias, që është kërkuar njëkohësisht si nga mazhoranca ashtu dhe Presidenti Meta.
