Policia e Shtetit ka publikuar 3 emrat e rradhës që ndodhen në listat e më të kërkuarve dhe që janë objekt i punës së Njësisë së Kërkimit.
Sipas një njoftimi zyrtar, në listën e publikuar sot përfshihen Aleks Totraku, Antonio Lala dhe Nexhip Rexho, të dënuar secili me nga 25 vjet burg me akuzat e vrasjes.
Kështu referuar policisë, shtetasi Aleks Totraku alias Abdyl Lala, në datën 1 janar 2013, në fshatin Mazrek të Komunës Kashar, në bashkëpunim me vëllanë e tij shtetasin Antonio Lala alias Mirjan Lala (person në kërkim) ka vrarë me armë zjarri shtetasin A. D. Aleks Totraku alias Abdyl Lala është dënuar me 25 vjet burgim, nga Gjykata e Rrethit Gjyqësor Tiranë, për veprat penale “Vrasja me paramendim, kryer në bashkëpunim” dhe “Armëmbajtja pa leje”.
Gjithashtu policia bëri të ditur se shtetasi Nexhip Rexho, në datën 27 gusht 2000, në lagjen “Uji i Ftohtë”, në Vlorë, ka vrarë me armë zjarri, për motive të dobëta, shtetasin L. M. dhe ka plagosur gruan e këtij të fundit, shtetasen T. M. Nexhip Rexho është dënuar nga Gjykata e Apelit Vlorë me 25 vjet burgim, për veprat penale “Vrasja me paramendim”, “Vrasja me paramendim” e mbetur në tentativë dhe “Armëmbajtja pa leje”.
