Shefi ekzekutiv i skuadrës së Milanit, Ivan Gazidis, ka deklaruar se skuadra e Milanit pavarësisht vështirësive, është në rrugën e duhur për tu rikthyer te lavditë e së kaluarës.
Gazidis dha një intervistë të gjatë për “La Gazzetta dello Sport”, duke analizuar situatën te kuqezinjtë, të cilët aktualisht ndodhen në një moment të paqartë.
55-vjeçari ka deklaruar se për të rikthyer klubin në statusin e mëparshëm duhet durim por thekson se kjo gjë do të ndodhë.
“Milani është një nga ekipet më të mëdha në botë, por të gjithë e dimë që vitet e fundit jemi shumë larg historisë së klubit”.
“Asnjë ëndërr nuk është e pamundur, por të gjitha ëndrrat kërkojnë përkushtim, durim dhe përpjekje të shumta. Qëllimi është të kemi një Milan modern, që rivalizon në nivelet më të larta në futbollin Italian dhe atë Europian. Nëse kemi durim atëherë do ia arrijmë kësaj gjëje”. – ka thënë ndër të tjera Ivan Gazidis.
