Rritja e kërcënimit nga ekstremi i së djathtës ka mobilizuar autoritetet në Gjermani. Për këtë do të vendosen policë shtesë për të mbrojtur xhami, stacione metroje dhe aeroporte, si dhe në zona të tjera sensitive në të gjithë vendin.
Vendimi është bërë i ditur nga Ministria e Brendshme gjermane, që konfirmon se masat janë pranuar nga liderët rajonalë për të parandaluar sulme të ngjashme me atë të ndodhur në qytetin Hanau, ku humbën jetën 9 persona. Prokurorët konfirmuan se autori, që i mori jetën nënës së tij përpara se të vetëvritej, kishte vepruar për motive raciste të theksuara.
“Vetëm në pak muaj patëm 3 sulme. Arrestuam 12 ekstremistë të së djathtës pasi shpresonin që të ndodhte një luftë civile. Dhe më pas patëm një sukses të madh duke konfiskuar eksplozivë. Kur i tregova kancelares, ajo refuzoi të besonte që dikush mund të kishte këtë lloj armatimi në shtëpinë e tij: sekuestruam granada dhe kallashnikovë”, tha Horst Seehofer, ministër i Brendshëm i Gjermanisë.
Për familjarët e viktimave të sulmit në Hanau, dhimbja është tepër e madhe.
“Vajza ime u vra këtu dhe ishte vetëm 35 vjeç. Ajo erdhi për të ngrënë pica dhe më pas u qëllua për vdekje. I kërkoj të gjithë Hanaut të kuptojë çfarë ndodhi këtu: një tragjedi”, tha babai i një viktime. Të mbijetuarit e tragjedisë treguan se autori, Tobias R, shenjtëronte me kujdes viktimat në dy lokalet ku ndodhi masakra dhe fokusohej kryesisht në pamjen e tyre të jashtme.
