Një sasi prej 1.3 ton kokainë raportohet se është sekuestruar nga një operacion në Maqedoninë e Veriut.
Sipas raportimeve paraprake të mediave vendase, lënda narkotike është sekuestruar në një magazinë frutash në fshatin Krushopek të Sarajit. Në këtë aksion raportohet se po marrin pjesë edhe pjesëtarë të Policisë Financiare italiane. Sipas mediave maqedonase, janë arrestuar të paktën 3 persona, 2 shoferë dhe 1 magazinier që punonin në magazinën e frutave ku u gjet edhe droga.
Aksionin e konfirmoi përmes një postimi në profilin e tij në Facebook edhe Ministri i Brendshëm Naqe Çulev. “Informoj opinionin se Ministria për Punë të Brendshme në këtë moment ka ndërmarrë disa masa operative dhe aktivitete. Me urdhër të gjykatësit të procedurës paraprake po kryhen bastisje në fshatin Krushopek në afërsi të Shkupit, për tregti të paligjshme të drogës”, shkruan mes tjerash Çulev.
