“Më shumë më paragjykoni mua se një kinez që ka një restorant në Tiranë apo shet te Medreseja”. Me këto fjalë iu drejtua Erion Veliaj të pranishmëve në një aktivitet të organizuar nga Ambasada e Kinës në Tiranë me moton “ne jemi bashkë”, në përkrahje të Kinës dhe kinezëve, që po luftojnë kundër epidemisë së koronavirusit të ri.
Duket se Kryebashkiaku Veliaj ka nisur një fushatë pikërisht me kinezët që jetojnë në kryeqytet prej vitesh, duke u shprehur se “Tirana është themeluar mbi parimet e një qyteti të hapur dhe jo të paragjykimit”.
Ajo që s’dihet është se si rrallë ndonjëherë, Veliaj apo stafi i tij, e kanë mbajtur të fshehtë aktivitetin, pra pa i dhënë publicitetin që ndodh shpesh me veprimtaritë ku ndodhet kryebashkiaku, i cili edhe kur mbjell një pemë ndiqet nga pas nga kameramanë e fotografë.
“Kryetari i Bashkisë së Tiranës ka qenë në Kinë 10 vitet e fundit më shumë se sa një kinez që jeton në Tiranë. Prej punës dhe shkëmbimeve kam qenë unë më shumë në Kinë se sa kinezi te Medreseja. Kështu që nëse është dikush që duhet paragjykuar ai duhet të jem unë se kam qenë më shpesh në Kinë dhe jo një kinez që shet te tregu te Medreseja apo ka një restorant në Tiranë”, tha Veliaj.
Pak ditë më parë, Veliaj postoi në rrjet një foto me një të ri nga Kina që jeton në Shqipëri, të cilin e kishte takuar me Pazari i Ri me rastin e 100 vjetorit të Tiranës kryeqytet.
Deputeti socialist Ervin Bushati tha se duhet t’i japim një mbështetje popullit kinez në këto momente duke i ndejtur pranë në të gjitha pikëpamjet, aq sa na takon se jemi të vegjël.
“Nuk e kam parë në ndonjë qytet tjetër në Evropë dhe është një përkrahje shumë e madhe për të gjithë qytetarët e Kinës”, tha Bushati.
Ndërkohë, ambasadori kinez në Tiranë, Zhou Ding, tha se Veliaj ka ardhur në komunitet dhe në restorant kinez, duke dhënë mbështetje ndaj Kinës dhe komunitetit kinez në Tiranë me veprime praktike.
