Lihet në qeli Vladimir Gjuta, i akuzuar për veprat penale ‘Armëmbajtja pa leje’, ‘Prodhimi, mbajtja, blerja apo shitja pa leje e armëve të ftohta’ dhe ‘Pastrimi i produkteve të veprës penale ose veprimtarisë kriminale’.
Prokuroria kërkoi arrest me burg për Gjutën, masë e miratuar nga Gjykata e Tiranës.
40-vjeccari u arrestua disa ditë më parë, pranë selisë së PS-së në kryeqytet, me armë zjarri me vete dhe një sasi të konsiderueshme monetare. Për paratë, avokati i tij tha në një prononcim për gazetarët se janë të ligjshme dhe se Gjuta i kishte për një biznes që kishte menduar të ngrinte.
“Ka mbrojtur pasurinë e vet, kështu e ka menduar ai. Me paratë ai pretendoi se paratë janë të ligjshme dhe i ka siguruar nga biznesi në Angli së bashku me familjarët. I duheshin për të krijuar një biznes, tregti me mallra amerikane. prokuroria kërkoi arrest me burg vetëm për paratë e gjetura. Paratë do i thyente për biznesin e tij”, deklaroi avokati.
Ndaj Gjutës ka nisur dhe hetimi pasuror.
Ndalimi
Gjuta u ndalua mëngjesin e 10 shkurtit.
“Shërbimet e Komisariatit të Policisë Nr.3, në rrugën ‘Çamëria’, rreth orës 08:45, bënë kapjen dhe arrestimin në flagrancë të shtetasit Vladimir Gjuta 40 vjeç banues në Tiranë, i dënuar më parë. Në momentin e kapjes nga Patrullat e Përgjithshme të Komisariatit të Policisë Nr. 3, këtij shtetasi iu gjetën me vete një armë zjarri pistoletë me municon luftarak, një dorezë grushti metalike, si dhe një sasi e madhe parash në valutë dhe Lekë shqiptare. Shërbimet e Policisë, në bashkëpunim me Sektorin për Krimin Ekonomik e Financiar dhe atë të Krimeve ndaj Jetës dhe Personit në DVP Tiranë, kanë ushtruar kontroll në banesën e këtij shtetasi, ku kanë gjetur dhe sekuestruar edhe shuma të tjera parash”, bëri me dije Policia e Tiranës.
“Në total iu gjetën dhe sekuestruan në cilësinë e provës materiale: 121.100 euro, 27.500 dollarë amerikanë, 22.970 paund anglez dhe 664.500 lekë të reja. Po gjatë kontrollit të banesës së Gjutës, shërbimet e Policisë gjetën dhe sekuestruan edhe një mjet të blinduar autoveturë ‘Audi A8’, me të cilën ai qarkullonte”, shtuan të njëjtat burime.
