“Zgjedhjet parlamentare dhe ato lokale duhet të mbahen në një ditë”. Kështu u shpreh kreu demokrat, Lulzim Basha, pas një takimi që zhvilloi sot me Ambasadorin e BE-së në Tiranë, Luigi Soreca, ku u diskutua mbi ecurinë e reformës zgjedhore.
Basha tha se kishte diskutuar me diplomatin gjerësisht mbi këtë reformë, ndërsa shtoi se nuk ka ndryshuar asgjë në prioritetet e PD-së lidhur me zgjedhjet e parakohshme.
“Gjithë beteja jonë është që të mbahen sa më shpejt zgjedhjet e parakohshme, kjo është rruga e vetme që shqiptarët të zgjedhin qeverisjen e tyre.
Kriza ekonomike është produkt i krizës politike, KÇK-ja sot në qeveri është kryeministri dhe qeveria.
Nuk ka ndryshuar asgjë në prioritetet tona, zgjedhjet parlamentare dhe ato lokale duhet të mbahen në të njëjtën ditë.
Nuk është lista e dëshirës së Lulzim Bashës dhe Partisë Demokratike, kjo mund të bëhet vetëm përmes zgjedhjeve të lira. I gjithë fokusi ynë është që procesi i Integrimit të vendit, të kalojë paralelisht me reforma në vendin tonë, dhe me zgjedhje të lira për qytetarët”, u shpreh Basha.
Lidhur me afatin për përfundimin e reformës zgjedhore brenda 15 marsit, ashtu sikundër është përcaktuar nga dokumenti i dakordësuar në takimin mes Oerd Bylykbashit dhe Petrit Vasilit me Damian Gjiknurin dhe Rudina Hajdarin, Basha tha se opozita është e gatshme që të japë të gjithë kontributin e saj që Reforma të përfundojë sa më parë, në mënyrë që vendit të hapet rruga për zgjedhje të parakohshme.
