Nga Boldnews.al
A vlen ekstradimi i një Gylenisti, sa disa banesa të ndërtuara falas nga qeveria turke e Rexhep Taip Erdogan? Nëse do të ishte për qeverinë Rama, tashmë me kohë do paketoheshin të gjithë të dyshuarit si “organizatorë të grushtit të shtetit në Turqi,” për t’iu dhuruar si trofe i çmuar për mikun Erdogan.
Megjithatë, Rama po luan me dy porta, ku nga njëra anë kërkon ndihmën e turqisë duke dorëzuar ndonjë”terrorist” dhe në anën tjetër ka frikën deri në palcë se nëse ekstradon shtetasit turq që jetojnë në Shqipëri, por që akuzohen nga qeveria atje për “grusht shteti” do ti mbërrite një “grusht” i fortë nga SHBA dhe disa nga vendet e zhvilluara të BE-së, të cilët haptas kanë dale kundër Erdogan.
Në këtë dilemë të madhe, Rama po provon edhe një herë të shpërndaje “hi diplomatik”, duke i ofruar disa “letra bashkëpunimi” qeverisë turke, përfshi edhe mundësinë e ekstradimit të të ashtëquajturve anëtarë të “Feto-s”, vetëm për një qëllim: “kërkon që sa më parë të thithë fondet që do lëvrohen nga shteti turk në ndërtimin e 500 shtëpive në zonën e Laçit, të shkatërruara pas tërmetit tragjik të 26 nëntorit të vitit të kaluar”.
Për ti mbajtur me gajret miqtë turq, Rama sot po përdor zëvendësministrin e Jashtëm Gent Cakaj, (këtë prurje të re politike, që u shit si “erudit” nga Baton Haxhiu, por doli kallamoq bosh).
Duke folur në përgjithësi për atë që qeveria e presidentit Erdogan i referohet si një organizatë terroriste, Mevlut Cavusoglu Ministri i Jashtëm i Turqisë deklaroi sot se: “Ka ende shumë anëtarë të FETO në Shqipëri. Ne nuk duam që Shqipëria të jetë parajsë për FETO-t. Shqipëria ka ndërmarrë disa hapa, por më shumë hapa duhet të ndërmerren,” deklaroi ai krahas Gent Cakajt.
Zëvendëministri ynë thjesht aprovoi me kokë, duke përshtjelluar edhe më shumë dyshimin për një marrëveshje të fshehtë mes qeverisë së Shqipërisë dhe të Turqisë, në lidhje me ekstradimin e disa shtetaseve turq që jetojnë dhe punojnë në Shqipëri, por që Ankaraja zyrtare i konsideron si terroristë. FETO është emri me të cilin qeveria turke i referohet lëvizjes Guleniste, një lëvizje fetare dhe biznesi e frymëzuar nga predikuesi Fethullah Gulen, i cili jeton në SHBA dhe që kërkohet nga qeveria e Erdogan, duke e akuzuar se ishte organizator i grushtit të dështuar të shtetit në vitin 2016.
Në ditën e parë të janarit, shtetasi turk Harun Çelik, u ekstradua drejt turqisë, ndonëse kishte kërkuar azil politik në vendin tonë. Kjo shkaktoi reagim të menjëhershëm të disa deputetëve të Parlamentit Europian, duke i kujtuar qeverisë shqiptare se me rastin e Çelik kishte shkelur konventat Europiane të të Drejtave të Njeriut. Edhe pse nga pala shqiptare u cilësua si një rast thjesht në “zbatim të ligjit”, vendi ynë është i monitoruar, veçanërisht nga shtetet anëtare të BE-së.
Rama tashmë është me dorën e shtrirë të lypjes dhe oazin për të hequr një hall jo fort të vogël për ndërtimin e banesave të shkatërruara nga tërmeti e ka gjetur në Turqi, pranë mikut të tij Rexhep Taip Erdogan. Tashmë duket se Turqia nuk do i lëshojë aq “badihava” miliona euro në ndërtimin e 500 banesave në Shqipëri, duke tentuar të rrëmbejë sa më shumë të dyshuar që sipas tyre janë anëtarë të organizatës FETO.
Si shpëtimtar i premtimeve dhe tentativës për të zgjatur sa më shumë në kohë diskutimet dypalëshe Rama po përdor të voglin Gent Cakaj. Thjesht duke e imagjinuar se në shpatullat e tij të brishta është çështja e esktradimit të bën të dyshosh se tashmë më shumë Rama po luan me premtime të cilat nuk ka forcë që ti mbajë.
Kryeministri ynë kërkon vetëm ndërtimin e 500 shtepive falas, për të bërë edhe më shumë propagandë dhe një mundësi për të zaptuar televizionet, nga hapja e themelit të parë të ndërtesave, deri në dorëzimin e çelësave në duart e banorëve të prekur nga tërmeti.
Çmimi është i rëndë, nuk do ketë shtëpi falas pa një haraçin që Erdogan duhet ta marrë pas. Nëse luan me marrëveshje të dyshimta, atëherë Ramën nuk e shpëton dot as djaloshi 28-vjeçar që ndonjëherë shfaqet si ministër e shpeshherë thjesht si një zëvendëministër.
