Seanca paraprake në Gjykatën Penale të Tiranës për ish-kryebashkiakun e Vorës Agim Kajmakun është shtyrë. Shkak për shtyrjen ka qenë mungesa e gjyqtares Vjollca Spahiu, për motive shëndetësore.
Seanca e radhës do të mbahet në 18 shkurt. Gjykata do të vendos nëse çështja Kajmaku do të kalojë për gjykim, do të rrëzohet apo do të kthehet për hetime të mëtejshme.
Kajmaku është prej tre muajsh në kërkim nga Policia, pasi gjykata e Tiranës ka caktuar masën e sigurimit “arrest me burg”, si i dyshuar për “falsifikim formulari”, “falsifikim dokumentash” dhe “përvetësim posti”.
Ish-kryebashkiaku i Vorës u denoncua nga PD dhe pas verifikimeve rezultoi se kishte fshehur arrestimin dhe më pas hetimin në Greqi me një emër tjetër, Jorgo Toto, duke bërë që ai të jetë në kushtet që e kap ligji i dekriminalizimit.
Para pak ditësh, Gjykata Administrative pezulloi nga detyra nënkryetari e bashkisë së Vorës, Genti Picari. Ai u emërua në këtë detyrë nga ish-kryebashkiaku Agim Kajmaku, një ditë pasi ky i fundit ishte shkarkuar nga Komisioni Qendror i Zgjedhjeve.
