Vizitën e parë zyrtare si Kryeministër, Albin Kurti do e zhvillojë në Tiranë, ku pritet të ketë brenda pak orësh një seri takimesh.
Vizita do të zhvillohet nesër (11 shkurt) dhe sipas mediave në Kosovë, Kurti do të takohet me homologun Edi Rama, Presidentin, Ilir Meta, Kryeparlamentarin, Gramoz Ruçi, Kreun e PD-së, Lulzim Basha dhe Kryebashkiakun Erion Veliaj.
Me Ramën është parashikuar edhe një konferencë e përbashkët për mediat në selinë e Kryeministrisë.
Nisja drejt Morinës për kthimin në Kosovë është parashikuar në 12.40.
Herën e fundit që ishte në Tiranë Kurti festonte fitoren e zgjedhjeve të 6 tetorit 2019 por nuk ishte dekretuar ende zyrtarisht si kryeministër.
Ndaj Kurtit ka pasur disa akuza veçanërisht nga Rama dhe Veliaj, ndësa VV kishte paralajmëruar mbajtjen e një tubimi në Tiranë më 28 nëntor, i cili u anulua për shkak të tërmetit shkatërrimtar të 26 nëntorit që goditi vendin.
