Kukësi ka marrë një fitore të madhe 3-1 përballë Laçit, duke rimarrë kreun e tabelës në Kategorinë Superiore.
Ishte një fitore me përmbysje e verilindorëve, pasi miqtë kaluan në avantazh në minutën e 36-të me anë të Nëabueze. Përgjigja e skuadrës së drejtuar nga Shpëtim Duro, erdhi vetëm 3 minuta më vonë teksa Kristal Abazaj barazoi gjithçka.
Golat e fitores për Kukësin do të vinin në pjesën e dytë në minutat 68’ dhe 79’ me golat e Shkurtaj-t dhe Valon Ethemit. Me këtë fitore Kukësi merr sërish vendin e parë duke kaluar Tiranën në vendin e dytë. Diferenca mes skuadrave është sërish vetëm 1 pikë.
Ndeshja tjetër mes Skënderbeut dhe Bylisit është mbyllur në barazim 1-1. Në Korçë nuk mungoi tensioni pasi ndeshja u ndërpre për disa minuta.
Gjithçka e filloi një penallti e dyshimtë në favor të korçarëve, teksa Dejvi Bregu u rrëzua në zonë dhe për gjyqtarin Shahini nuk kishte dyshime, duke drejtuar gishtin te pika e bardhë e penalltisë. Në këtë moment pati kontestime të mëdha dhe lojtarët e Bylisit kërkuan të linin fushën e lojës.
Pas disa minutave ndërprerje, ndeshja rifilloi sërish. Goli i barazimit për Bylisin do të vinte në minutën e 86-të, ku Gaston mposhti portierin Koliç me një gjuajtje të bukur brenda zonës, duke shtangur korçarët.
