Nga BoldNews.al
Qeveria e Edi Ramës ka vendosur të mos tërhiqet nga shkeljet kushtetuese në seri, për të plotësuar platformën propagandistike “Anti-KÇK (Kap Çfarë të Kapësh).
Pas show-t me Operacionin Forca e Ligjit (OFL), e cila përtej rezultateve “spektakolare” kundër “të fortëve” do të rezultojë një blof ligjor e procedurial brenda pak javësh, maxhoranca po avancon me projekt-ligjin për pezullimin e përkohshëm të gjyqtarëve dhe prokurorëve, në rast se ndaj tyre ka ankesa apo dyshime për vendime të kundërligjshme.
Kjo nismë, e cila është shpallur anti-kushtetuese rreth 3 vjet më parë, rikthehet nga Partia Socialiste në pushtet, në argumentimin e situatës emergjente të krijuar nga vendimmarrja e gjyqtarëve dhe prokurorëve, të cilët, sipas maxhorancës, po shfrytëzojnë boshllëkun ligjor për të “Kapur Çfarë të Kapin”, në pritje të shkarkimit nga Vetingu.
Përtej argumentimit zyrtar, nisma më e fundit e maxhorancës që bie në kundërshtim me Kushtetutën dhe me një Vendim të Gjykatës Kushtetuese të vitit 2017, është një koperturë e vullnetit qeveritar për të mbajtur nën presion sistemin e drejtësisë, nëpërmjet kërkesave për pezullimin e tyre nga detyra.
Katër vjet pas miratimit të Reformës në Drejtësi maxhoranca ka marrë nën kontrollin e saj mekanizmat kontrollues të karrierës së gjyqtarëve dhe prokurorëve. Por, duket se “arritjet” e deritanishme nuk përmbushin vullnetin qeveritar për të pasur nën kontroll absolut sistemin e drejtësisë.
Ndaj, nëpërmjet ndërhyrjes së fundit në ligjin “Për Statusin e Gjyqtarëve dhe Prokurorëve”, Partia Socialiste po synon që të mbajë nën diktatin e saj këdo zyrtar të sistemit të drejtësisë, që do të guxojë t’i kundërvihet.
“Boldnews.al” ka bërë një krahasim mes projekt-ligjit aktual qeveritar, me Kushtetutën e Republikës së Shqipërisë dhe Vendimin nr. 34, dt. 10.03.2017 të Gjykatës Kushtetuese. Faktet dëshmojnë se maxhoranca, megjithëse e bindur se po vepron në kundërshtim me Ligjin Themeltar, sërish nuk tërhiqet nga rruga e saj.
Më konkretisht, shkeljet kushtetuese shpjegohen në vijim, nëpërmjet tabelës, si edhe tekstit përshkrues:
– Kushtetuta, në nenin 140 të saj, parashikon se gjyqtarët dhe prokurorët pezullohen nga detyra kur ndaj tyre është aplikuar masë sigurimi “arrest në burg” apo “arrest shtëpie”; kur kanë marrë cilësinë e të pandehurit për vepra penale; dhe kur ndaj tyre ka nisur procedimi disiplinor.
– Ligji “Për statusin e gjyqtarëve dhe prokurorëve”, i miratuar në vitin 2016, në nenin 152 të tij, parashikonte se gjyqtarët e prokurorët mund të pezulloheshin edhe “në bazë diskrecioni” ose, më qartësisht “në bazë të indicjeve ose bindjeve që mund të krijohen për gjyqtarë apo prokurorë”.
– Gjykata Kushtetuese, në vendimin e Marsit 2017, e shpalli anti-kushtetues nenin 152 të ligjit “Për statusin e gjyqtarëve e prokurorëve”, pikërisht “pezullimin në bazë diskrecioni”. Sipas Gjykatës Kushtetuese, ky nen, pra “pezullimi mbi bazë diskrecioni”, tejkalon parashikimet Kushtetutese për rastet e pezullimit të gjyqtarëve dhe prokurorëve.
– Qeveria, nëpërmjet paketën “Anti-KÇK” rikthen sërish “pezullimin mbi bazë diskrecioni”, pikërisht atë që Gjykata Kushtetuese e ka shpallur anti-kushtetuese.
– Për më tepër, qeveria, me paketën “Anti-KÇK” shkel edhe një tjetër nen të Kushtetutës, e konkretisht neni 147/d. Ky nen parashikon se “Inspektori i Lartë i Drejtësisë është përgjegjës për verifikimin e ankesave, hetimin me nismë të shkeljeve dhe fillimin e procedimit disiplinor ndaj gjyqtarëve dhe prokurorëve të të gjitha niveleve…”.
Ndërkohë që paketa “Anti-KÇK” parashikon se kompetencat e Inspektorit të Lartë të Drejtësisë i kalojnë Këshillit të Lartë Gjyqësor dhe Këshillit të Lartë të Prokurorisë.
Dhe, së fundmi, megjithëse shkeljet e rënda kushtetuese, projekt-ligji i maxhorancës mori mbështetjen publike nga Inspektori i Lartë i Drejtësisë, Artur Metani.
I zgjedhur në kundërshtim flagrant me ligjin dhe i njohur për lidhjet e forta me Partinë Socialiste në pushtet, Metani mbështeti plotësisht këto ndryshime ligjore, gjatë një dalje publike paraditen e kësaj të shtune.
Ai deklaroi para medias se ndryshimet ligjore janë shumë të nevojshme, pavarësisht se ato bien ndesh me Kushtetutën e Republikës së Shqipërisë.
