Analisti Andi Bushati e ka cilësuar paketën anti-KÇK si një nismë e kryeministrit Edi Rama për të rikontrolluar krimin e organizuar.
I ftuar në ‘Top Talk’, Bushati theksoi se anti-KÇK dhe OFL po përdoren nga Rama si presion ndaj kriminelëve, duke ju thënë që nëse nuk i binden atëherë ai do tu sekuestrojë pronat.
“Për mua është akoma shpejt të flitet se ne ende nuk kemi parë rezultat. Unë dyshoj se qëllimi primar është që në njëfarë mënyrë për të rikontrolluar krimin dhe për ta bërë një forcë të armatosur të rilindjes. Përse e them këtë. Rama gjithmonë ka flirtuar me krimin, herë i ka futur kryebashkiakë, herë i ka futur deputet, herë i ka dhënë leje ndërtimi. Pra ka pasur gjithmonë një atutë të jetës së vet politike. Në njëfarë mënyrë të gjitha këto janë diskretituar, një kriminel nuk futet dot më deputet, si shkak i imazhit publik, si shkak i ligjit të dekriminalizimit. Rama pasi i ka treguar për një periudhë të gjatë karotën, tani po u tregon shkopin dhe po jua tund atë. Ju do të më shërbeni mua, sepse nëse nuk më shërbeni mua, unë ja ku e kam paketën Anti “KÇK” dhe mund t’ju sekuestroj prona, mund t’iu privoj nga liria e tjerë e tjerë”, u shpreh Andi Bushati.
