Gjykata e Durrësit ka caktuar masën “Arrest me burg” për shtetasin Lulzim Cuku, i cili vrau me thikë gruan e tij Manjolën në Xhafzotaj.
Mësohet se gjatë seancës, nuk kanë qenë të pranishëm asnjë prej familjarëve të 45-vjeçarit. Cuku u shfaq i çorientuar në gjykatë duke deklaruar se kishin kohë që grindeshin me bashkëshorten dhe se dyshonte se ajo e tradhtonte.
“Prej tre muajsh kemi nisur të debatojmë. Kisha arsye se kisha gjetur gjëra të cuditshme në shtëpi që më bënin të dyshoja se me tradhetonte. Vjehrri me tha që shtepia është kthyer në vend drogaxhinjsh, prandaj vendosa ta merrja me vete në Greqi. Por ajo nuk pranoi”, ka thënë në sallën e gjyqit Lulzim Cuku.
Ai dyshonte se kur shkonte në Greqi për të punuar, ajo mund ta tradhtonte pasi ishte e bukur dhe më e re se ai. Manjola Cuku rezultonte me urdhër-mbrojtje nga gjykata e Durrrësit, pasi ishte dhunuar edhe herë të tjerë nga bashkëshorti.
Pasi ka vrarë bashkëshorten me thikë, ai e ka kyçur në banjë dhe është arratisur, për tu kapur disa orë më pas në Mat. Burime të policisë thanë se kur mbërritën në banesë gjetën fëmijët teksa qanin mbi trupin e nënës.
Vajza e tyre ishte dëshmitare e ngjarjes dhe i ka komunikuar prokurores se babai i saj Lulzim Cuku, e tërhoqi nënën nga tualeti deri tek dera ndërkohë që ajo ishte e mbytur në gjak. Ajo thotë se u zgjua natën e 2 shkurtit për shkak të të qarave të së motrës, ndërkohë ka dëshmuar se Lulzim Cuku e rrihte vazhdimisht Majlinda Cukun.
Mbrëmjen e të shtunës, kur kishte vetëm disa ditë që ishte kthyer nga emigracioni, Lulzim Cuku ka goditur tre herë me thikë bashkëshorten e tij Manjolën në prani të tre fëmijëve të mituar dhe u arratis pas aktit të rëndë. Pas disa orësh ai u vetëdorëzuar në komisariatin e Burrelit dhe pranoi krimin.
Në zonën ku çifti jetonte, Cuku cilësohej si një tip problematik dhe jo i qendrueshëm, kurse bashkëshortja krejtësisht e kundërta.
