Sfida e mbrëmjes së djeshme mes Lacios dhe Veronës u mbyll në barazim pa gola.
Në “Olimpico” u vunë përballë dy nga skuadrat më në formë në kampionatin italian, ndërsa ashtu siç pritej, ndeshja ishte me ritëm të lartë dhe shumë e luftuar, ndonëse topi nuk përfundoi asnjëherë në rrjetë.
Lacio i shkoi më pranë golit me 3-4 raste të pastra shënimi, por herë portieri Silvestri e herë shtyllat, bënë që topi të mos përfundonte në rrjetën e Veronës, që nga ana tjetër luajti me autoritet dhe pati shanset e saj gjatë lojës.
Vlen të theksohet se përveç Thomas Strakoshës në portën e Lacios, në formacion ishin edhe Amir Rrahmani e Marash Kumbulla për Veronën, me këtë të fundit që u ndëshkua shpejt me karton të verdhë, por që diti të menaxhojë me kujdes situatat e krijuara në minutat në vijim.
Kujtojmë që kjo ishte një ndeshje e prapambetur dhe një mundësi e humbur e kryeqytetasve për të marrë vendin e dytë si dhe për të ngushtuar diferencën me Juventusin kryesues.
