Javët e fundit është vënë re se gabimet në gjykimet e ndeshjeve janë shtuar. Herë pa pasoja në rezultat e herë vendimtare për fatet e ndeshjeve, ky fenomen është vënë re edhe nga FSHF-ja që pak ditë më parë thirri për një mbledhje për të diskutuar për rastet.
Një ndër klubet që është prekur është edhe Skënderbeu, të cilëve iu është mohuar një penallti në Laç. Dy ditë pas humbjes, ka reaguar presidenti Ardjan Takaj, i cili ndihet i shqetësuar për një humbje të tillë kur kishin mundësinë të merrnin diçka më shumë.
Në një intervistë për “Panorama Sport”, Takaj ka folur për situatën kaotike në gjykimin në futbollin shqiptar, ndërsa ka një thirrje të veçantë drejtuar FSHF-së. Sipas tij, “bluzat e zeza” kanë nevojë për një kontroll të specializuar.
“Çfarë të thuash për këtë situatë?! Kanë luajtur mendsh arbitrat. Tashmë janë bërë ata protagonistët e garës… Nuk flitet më për futboll, por vetëm diskutohet cili arbitër gabon më shumë javë pas jave”, ka thënë fillimisht Takaj për gazetën. Ndërsa më pas kreu i klubit korçar i dërgon edhe një mesazh institucionit të futbollit shqiptar.
“FSHF duhet t’i kontrollojë arbitrat në ndonjë klinikë të specializuar, në mënyrë që të shikojë me çfarë virusi janë infektuar ata”, përfundoi presidenti i Skënderbeut, duke ironizuar jo pak me atë që po ndodh aktualisht në kampionat.
