Ish-deputeti i Partisë Demokratike, Genc Pollo ka komentuar metodologjinë e re e zgjerimit të Bashkimit Evropian e publikuar një ditë më parë, ku forcohen kriteret për çeljen e negociatave me vendet kandidate për anëtarësim.
Dokumenti i ri parashikon pezullim të negociatave në rast se konstatohet regres për vendet që aspirojnë anëtarësimin në union. Për ish-deputetin demokrat, Pollo, metodologjia e re e prezantuar nga komisioneri Oliver Varhelyi ka dy momente të rëndësishme.
I pari ka të bëjë me funksionimin e shtetit ligjor dhe e dyta përqendrimi i vëmendjes te problemet reale në Shqipëri dhe Maqedoninë e Veriut, të cilat po pengojnë vazhdimësinë e kursit europian.
Postimi i Pollos
Ndoqa me vëmendje prezantimin e metodologjisë së re nga Komisioneri i Zgjerimit Oliver Varhelyi. Dy gjëra më lanë mbresë të veçantë. E para fokusi i tij e i metodologjisë së re tek zbatimi në praktikë i shtetit ligjor. Së dyti tek përpjekja e tij gjatë vizitës në Tiranë e Shkup për të kuptuar rrënjët e problemeve që pengojnë integrimin europian. Diçka e re dhe jashtzakonisht pozitive do të thoja. GP
