Operacioni Forca e Ligjit i ka kërkuar 3 personave të tjerë, banues në Durrës, të vetëdeklarojnë burimin e pasurive që kanë.
Në një deklaratë për mediat, biondja me syze e OFL tha se në vijim të zbatimit të Ligjit Special për masat pasurore ndaj individëve të dënuar apo akuzuar për krim të organizuar apo krime të rënda, OFL sapo i ka nisur kërkesat me shkrim për vetëdeklarimin e burimeve të pasurisë, shtetasve:
– Dashamir Gjoka, me banim në Durrës, pasi rezulton i dënuar në Itali për veprën penale “Trafik i qenieve njerëzore”.
– Emiljano Hajri, me banim në Durrës, pasi rezulton i dënuar në Gjermani për trafikim narkotikësh dhe pastrim parash.
– Edlir Hajri, banues në Durrës, me lidhje familjare me Emiljano H., pasi dyshohet se gëzon pasuri të prejardhura nga krimi.
“Këta individë, si subjekt i Ligjit Special, duhet t’u përgjigjen me shkrim të gjitha pyetjeve të OFL-së dhe përgjigjet e marra do t’i dërgohen SPAK-ut, i cili do të vlerësojë dosjen e përgatitur nga OFL-ja mbi aktivitetin kriminal të këtyre subjekteve, si edhe pasurinë e tyre.
Sapo të bëjë këtë vlerësim, SPAK-u duhet t’i kërkojë Gjykatës Speciale masën e sekuestrimit për pasuritë e subjekteve dhe pas sekuestrimit, në jo më shumë se 6 muaj Gjykata Speciale duhet të vendosë për konfiskimin përfundimtar të tyre”, thuhet në njoftimin zyrtar të OFL.
Por në rastin e shtetasit Dashamir Gjoka, pronat e tij kanë kaluar në filtrin e drejtësisë.
Kështu, Gjykata e Krimeve të Rënda me kërkesë të Prokurorisë, kishte vendosur që në datën 4.3.2017 konfiskimin e pronave të tij, që janë vlerësuar me një vlerë 2 mld lekë të vjetra.
Nuk dihet nëse OFL ka dijeni ose jo për vendimin që ka marrë Gjykata e Krimeve të Rënda rreth 3 vite më parë, por duket se ky është rasti i dytë pas pronave të Hajrit, që i ishin sekuestruar pronat në vitin 2015.
Pasuria e Dashamir Gjokës:
Pasuria me sipërfaqe 6949 m² truall dhe 2012.17 m² ndërtesë, kompleks shërbimesh “Gjoka”, ndodhur në Durrës;
Pasuria me sipërfaqe 4639 m² arë, ndodhur në Durrës;
Pasuria me sipërfaqe 1247 m² truall dhe 230 m² + 710 m² ndërtesë, ndodhur në Durrës;
Pasuria me sipërfaqe 928 m² truall dhe 229 m² ndërtesë dy kate, ndodhur në Durrës;
Shoqëria “Gjoka” sh.p.k., së bashku me të gjitha asetet e saj.
Vlera totale e pasurive të konfiskuara është llogaritur në vlerën prej rreth 200.000.000 lekë (te reja).
