Ivan Rakitiç nuk është më në planet e Barcelonës dhe kroati është prej kohësh në kërkim të një skuadre ku do të mund të luajë si titullar.
Së fundmi “Cadena SER” ka bërë të ditur se Atletico Madrid, ka nisur negociatat me Barcelonën për një transferim të mundshëm në fundin e sezonit.
Këto zëra, në mënyrë indirekte i ka konfirmuar edhe vetë lojtari, pasi të dielën e kaluar ai deklaroi se kishte menduar të largohej nga “blaugranasit” që në merkaton e janarit.
“E mendova largimin në afatin kalimtar të janarit. Mënyra sesi më trajtoi stafi i Valverdes nuk ishte më e mira. Ishin kohë të këqija por kjo mbetet në të kaluarën”, shtoi ai. “Mund ta them shumë qartë se ndodhen disa gjëra që nuk më pëlqyen aspak”.
Ndërsa fjalët e tij drejtoheshin për situatën nën drejtimin e Valverdes, besohet që kroati nuk është në planet e klubit dhe ardhja në stol e Setien mund të ndryshojë pak për të ardhmen e tij te Barcelona.
