Nga Boldnews.al
Me një ceremoni “madhështore” në ambientet e Ministrisë së Brendshme erdhi pajisja e poligrafit, ose siç njihet ndryshe “makina e së vërtetës”. Vetë ministri Lleshaj falënderoi ambasadoren e re amerikane në vendin tonë Yuri Kim për ardhjen e makinës së poligrafit, ku kanë nisur edhe “instruktimet” si të përdoret.
Më pas do fillojë puna dhe të shihen testet e para. Në këtë filtër pritet të kalojnë zyrtarët e BKH-së (Byrosë Kombëtare të Hetimit) dhe drejtues të lartë policie. Makina “inteligjente” përcakton momentin kur gënjen individi, teksa ndër të tjera do të pyetet edhe: a keni pranuar ryshfet dhe a jeni marrë me trafikim ose përdorim të drogës? Nëse individi që po merret në shqyrtim gënjen, makineria jep sinjale disi çoroditëse me ulje ngritje të grafikut në munitor.
Nuk përjashtohet mundësia që disa të mbesin para këtij testi dhe disa të tjerë mund ta kalojnë. Po sot pyetja më e madhe që ngrihet është a duhet të kalojë testin e poligrafit kryeministri? Përveç pyetjeve që lidhen me “përdorimin personal, ose jo të narkotikëve”, çka nuk është vepër penale, duhet të kalojnë në testin e makinës së të vërtetës a e lejuan kanabizimin e vendit në vitet 2016-2017.
E megjithatë, doli “vullnetar” një martir i vërtetë, ministri i brendshëm Sandër Lleshaj. “Poligrafi është një dhuratë nga SHBA-së për një reformë të vërtetë në Drejtësi. Kjo është një ditë historike, është një instrument i ri objektiv që ndihmon jo vetëm në finalizimin e hapave të reformës në drejtësi, por nuk do të përdoret vetëm për SPAK-un, por për të gjitha rekrutimet e reja në polici. Makinën e së vërtetës unë do t’ja nisja nga vetja”-tha Lleshaj.
Me shumë gjasë mund të kalonte disa teste me sukses mbi përdorimin e drogës ose jo, por gjenerali do të mbeste para poligrafit nëse do të pyetej se a ka urdhëruar përdorimin e gazit llotsjellës mbi gra, fëmijë dhe të moshuar që tentonin të mbronin banesat e tyre?!
Edhe në këtë pikë poligrafi me siguri do fikej i gjithi. E kjo makinë e së vërtetës nuk është për shfaqje spektakli, për dy orë ceremoni, por një turp për shoqërinë tonë. Një tjetër pyetje e rëndësishme, që do vlente për çdo politikan duhet të jetë nëse kanë abuzuar me fondet publike, apo janë përfshirë në afera korruptive. Padyshim që “poligrafi” do të shkatërrohej i gjithë nëse përgjigjia e tyre do të ishte: “Nuk kemi abuzuar me fondet publike dhe jetojmë me rrogën e shtetit”.
Çdo politikan “makinën e së vërtetës” e kalon minimalisht një herë në katër vite, përpara elektoratit që thirret në votime, por sot pushteti nuk e llogarite këtë test të rëndësishëm, pasi shitblerja e votave, përdorimi i krimit për të marrë pushtetin dhe akoma më rënë, futjen e vetë krimit brenda qeverisjes, lokale dhe qëndrore janë elementë që sot askush nuk i ka guzim ti mojojë dot, me përjashtim të Rilindasve të thekur që propagandojnë mashtrimin për ta shitur si të vërtetë në çdo dalje publike.
