Policia e Shtetit ka reaguar pas 48 orësh lidhur me djegien e automjetit, në pronësi të Bashkisë së Peqinit, që përdorej nga Madrid Sula, njëherazi edhe kryetar i degës së PS-së.
Sipas njoftimit të policisë, “gjatë natës së datës 30.01.2020, në lagjen “Teqe”, Peqin, ka rënë zjarr dhe është djegur pjesërisht mjeti tip “Toyoto”, në pronësi të Bashkisë Peqin. Nga veprimet e kryera nga grupi hetimor rezulton se zjarri ka rënë si pasojë e një defekti në pjesët elektrike të mjetit. Materialet i kaluan Prokurorisë pranë Gjykatës së Shkallës Parë Elbasan, për ngjarje aksidentale”.
Ndërkohë News24 raporton se makina e nënkryetarit të bashkisë së Peqinit dyshohet se është djegur nga dy persona.
Automjeti tip fuoristradë me targë AA880 DR, ishte e parkuar në një rrugicë pranë shtëpisë së nënkryetarit të bashkisë Peqinit pasi kishte pësuar defekt në kambio. Sula i cili është edhe kryetar i degës së PS-së në Peqin si dhe drejtuesi i këtij automjeti kishin sinjalizuar për defektin edhe titullarin e institucionit dhe kishin marrë masa për dërgimin e tij në servis.
Madrid Sula u zgjodh në krye të degës së PS-së, me një proces ku u raportuan edhe incidente dhe sherre. Kështu media raportoi se Bilal Hasa është qëlluar me sende të forta nga disa persona.
Dyshohet se ngjarja lidhet pikërisht me procesin zgjedhor që u zhvillua në Peqin lidhur me kryetarin e ri të PS në këtë degë, zgjedhje të shoqëruara me debate të forta.
