Policia e Shkodrës ka njoftuar se ka arrestuar Tom Shytin, i shpallur në kërkim nga policia prej gati 2 vitesh pasi akuzohej “për shpërdorim detyre” për falsifikimin e dokumenteve për rreth 41 mijë ha tokë në zonën turistike të Thethit. Shyti ka qenë inspektori i taksave pranë komunës Shalë.
“Nga Seksioni për Hetimin e Krimit Ekonomiko-Financiar, të DVP Shkodër, pas një pune të mirëorganizuar u kap dhe u ndalua shtetasi në kërkim, Tomë Shyti, 56 vjeç, banues në fshatin Thethë, Shkodër. Kapja dhe ndalimi i tij u bë pasi Gjykata e Apelit Shkodër, me vendim të formës së prerë Nr.917, datë 22.11.2018, e ka dënuar me 2 (dy) vite burg, për veprën penale të ‘Shpërdorimi i detyrës’. Materialet iu referuan Prokurorisë së Rrethit Gjyqësor Shkodër, për veprime të metejshme”, njoftoi policia.
Sipas hetimeve të prokurorisë, ish-kryetari i Komunës Shalë, bashke me dy ish zyrtarë të tjerë, në kundërshtim me ligjin, kanë shpërndarë rreth 41.500 m2 tokë në zonën turistike të Thethit. Ish-kryetari i komunës Dedë Tonaj, në bashkëpunim me ish-vartësit e tij Tom Shyti dhe Gjovalin Lokthi ka falsifikuar dokumenta zyrtare, në bazë të të cilave persona të ndryshëm janë bërë pronarë të tokave në zonën turistike, pa pasur asnjë të drejtë ligjore për përfitim të pronësisë. Dedë Tonaj, në bashkëpunim me shtetasin Tomë Shyti, me detyrë inspektori i taksave pranë komunës dhe kryeplakun Gjovalin Lokthin, ndër të tjera, ka lëshuar AMTP në kundërshtim me kriteret e përfitimit te tokës edhe në favor të fëmijëve të tij.
Në Maj 2019, u arestua dhe ish-kryetari i Komunës Shalë në Shkodër, Dede Tonaj.
