Është arrestuar në Askoli, shqiptari i armatosur i cili mëngjesin e sotëm qëlloi karabinierët në një postbllok në qytezën Colonnella, raportuan mediat lokale.
Shqiptari, personi që shihni në fotografi, pas një konflikti me armë zjarri u arratis me një skuter që ia mori me dhunë një qytetari dhe më pas ndaloi një shofer të cilin e kërcënoi me armë.
Këtij të fundit, i vodhi makinën tip “Mercedes” dhe u drejtua drejt veriut në zonën e Askolanos. I ndjekur nga policia, atij iu desh të braktiste makinën në zonën Campolungo, afër Castel di Lama.
Shqiptari u ndalua pranë Piceno-s. Dyshohet se është lënduar. Nuk është e qartë për momentin nëse arratisja e tij ishte e lidhur me një vjedhje të kryer në qendrën tregtare “Colonnella” mëngjesin e sotëm. /BN/
