Kuvendi do të mblidhet sot në orën 10:00 në seancë plenare. Në rendin e ditës janë 11 çështje, përfshi edhe dy dekretet e Presidentit, i cili ktheu mbrapsht “Paketën Antishpifje”. Pritet që dekretet e Metës të rrëzohen në bllok nga Rilindja, e cila ka deklaruar se do të miratojë dy ligjet për mediat online pa i ndryshuar, edhe pse ka pasur apele nga institucionet ndërkombëtare dhe organizatat që mbrojnë lirinë e medias për rishikimin dhe përmirësimin e tyre.
Gjithashtu në rendin e ditës është një interpelancë urgjente me ministren e Infrastrukturës, Belinda Balluku, e kërkuar nga deputetët e “opozitës së re”. Gjithashtu në seancë do të diskutohet edhe projektligji për kontrollin dhe disiplinimin e punimeve të ndërtimit, ku pritet të propozohen disa masa shtrënguese mbi kriteret e këtij sektori pas tërmetit të 26 nëntorit.
