Kryeministri Edi Rama është shprehur optimist lidhur me planin e rindërtimit, pas takimit që ka pasur me Presidenten e Komisionit Europian, Ursula von der Leyen, i zhvilluar dje në Bruksel.
Përmes një video-mesazhi të publikuar në rrjet, Rama bën me dije se takimi ka zgjatur më shumë se dy orë dhe qëllimi parësor i vizitës ishte adresimi i problematikës së pas tërmetit me fokus konferencën e donatorëve që është thirrur pikërisht nga Presidentja e Komisionit në Bruksel në 17 shkurt.
“E informuam për të gjitha aspektet e punës sonë për trajtimin e problematikës së pas tërmetit. Që nga trajtimi i familjeve të prekura, tek raporti i dëmeve, që po finalizohet së shkruari në bashkëpunim me ekspertët e BE, OKB-së, Bankës Botërore.
Takimi i mbrëmshëm ishte konfirmim i gatishmërisë së plotë dhe angazhimit konkret të saj për të ndihmuar operacionin e rindërtimit dhe plani i saj shkon më tej konferencës. Do vazhdojmë të punojmë së bashku”, shprehet Rama.
