Ambasadorja amerikane në Tiranë, Yuri Kim, vijon takimet me drejtues të institucioneve në vend, ndërsa dy ditë më parë mori zyrtarisht detyrën.
Kështu sot, diplomatja amerikane ka nisur serinë e takimeve me ministrin e Brendshëm, Sandër Lleshaj, për të vijuar më pas me Prokurorin e Përgjithshëm, Olsian Çela.
Lufta ndaj krimit, korrupsionit dhe reforma në drejtësi mësohet se kanë qenë temat kryesore në takimet që zhvilloi diplomatja amerikane.
Lidhur me takimin me ambasadoren e SHBA-së, ministri Lleshaj në një postim në rrjet shkruan se “ndamë vlerësime të njëjta për nevojën e një faze të re në luftën kundër krimit të organizuar dhe trafiqeve, për rolin e pazëvendësueshëm të Policisë së Shtetit për suksesin e reformës në drejtësi, për projekte të reja bashkëpunimi me SHBA, për thellim të partneritetit mes institucioneve të sigurisë nga të dyja vendet dhe për çështje të tjera me rëndësi”.
“SHBA vijojnë të jenë partneri ynë i madh strategjik, përherë në krah dhe në mbështetje të përparimit të gjithanshëm të vendit tone”, shkruan Lleshaj.
Mësohet se në ditët në vijim, ambasadorja e SHBA do të ketë takime me drejtues dhe anëtarë të institucioneve të drejtësisë, ku pritet të diskutohet mbi ecurinë e reformës në këtë fushë. Q
