Mesditën e kësaj të enjteje, qendra e Lëvizjes VETËVENDOSJE! në Shqipëri mbajti sot një konferencë për shtyp përpara hyrjes së një hoteli në kryeqytet, ku ka vendosur një baner me mbishkrimin: “Këtu një kriminel lufte po vjen të pozojë si bamirës”.
Ky mesazh i referohet vizitës së presidentit të Serbisë, Aleksandar Vuçiç, ditën e premte në Tiranë, në kuadër të takimit të të ashtuquajturit “Shengen Ballkanik”. Ai do të vijë në Shqipëri të premten ku fillimisht do të mblidhet në Tiranë me kryeministrin Edi Rama dhe atë Maqedonisë së Veriut Zoran Zaev dhe më pas do të vizitojnë zonat e prekura nga tërmeti. Ky takimi mes tre liderve vjen pas atij të tetorit.
Kryetari i Bordit të Qendrës së Lëvizjes “VETËVENDOSJE” në Shqiëpëri, Enis Sulstarova, tha para mediave se qeveria në Shqipëri po përpiqet që një kriminel lufte si Aleksandar Vuçiç ta paraqesë si bamirës të të prekurve nga tërmeti i nëntorit, duke tentuar t’ia shplajë figurën Vuçiçit.
“Mirëpo, shqiptarët e dinë se presidenti i Serbisë ka qenë Ministër i Informacionit gjatë kohës kur regjimi i Milosheviçit ka kryer masakra të shumta në Kosovë. Ushtria dhe paramilitarët serbë kanë vrarë e masakruar me mijëra civilë, nuk kanë kthyer mbi 1600 persona që mbeten të pagjetur, kanë dhunuar 20 mijë gra e vajza, kanë shkatërruar mbi 100 mijë shtëpi, kanë vjedhur artefaktet kulturore e fondin pensional, kanë shkatërruar mbi 50% të traktorëve dhe të bagëtisë në Kosovë, dukë bërë që Serbia t’i ketë borxh kombit shqiptar mbi 20 miliardë euro si dëmshpërblime lufte. Qeveria Vuçiç vazhdon ta luftojë pavarësinë e Kosovës dhe punon pa u ndalur kundër interesave të kombit shqiptar. Sot që Kosova njëzëri refuzon të marrë pjesë në një takim ku ministri i Milosheviçit paraqitet si bamirës, interesi kombëtar na thotë se të njëjtin qëndim duhet të mbante edhe qeveria e Shqipërisë.
Sulstarova njoftoi se këtë të premte në orën 17:00, në lulishten ‘Qemal Stafa’, përballë këtij hoteli, Qendra e Lëvizjes VETËVENDOSJE! do të zhvillojë një aksion simbolik paqësor për të shprehur kundërshtimin ndaj vizitës së Aleksandër Vuçiç dhe ‘mini-shengenit ballkanik’. Vuçiç nuk mund ta shmangë drëjtësinë duke dhënë lëmoshë. Ai mbetet persona non grata për shqiptarët. Ftojmë qytetarët të na bashkohen këtë të premte për të shprehur njëzëri kundërshtimin tonë”, vijoi ai.
