Avokati Ledio Braho shpjegon se pse vendimi i gjyqtarit të Tiranës Artan Gjermeni për çështjen “Geron Xhafaj” u dha i bazuar vetëm në dyshimet e prokurorisë.
Në studion e televizionit “EuroNews”, avokati i ish-deputetit të PD-së Ervin Salianji, i cili u dënua me 1 muaj burgim, tha se “prova realisht prokuroria nuk ka, pra asnjë nga dyshimet e prokurorisë nuk mundet që të shkojë në favor të akuzës”.
Braho tregon se si nga mbrojtja është rrëzuar pretendimi i Fredi Alizotit, se ka marrë 200 mijë euro për të imituar zërin e Geron Xhafajt, vëllait të ish-ministrit të Brendshëm, në audio-përgjimin me Albert Veliun.
Avokati e cilësoi të “ndikuar politikisht” vendimin e Gjykatës së Tiranës, ndërsa paralajmëroi apelim të çështjes.
INTERVISTA
Gazetarja: Cilat janë arsyet që ju shtyn ju të deklaroni që ky vendim i gjykatës ishte i padrejtë dhe politik?
Ledio Braho (Avokati i ish-deputetit Ervin Salianji): Atëherë, ne gjatë gjithë procesit, që është një proces që ne vetëm në gjykatë të Shkallës së Parë na ka zgjatur rreth tetë muaj, ku javë për javë kemi bërë seanca me dëshmitarë, prova, kemi dëgjuar përgjimet, është analizuar akti i ekspertimit, sepse është një dosje shumë voluminoze për shkak të rrethanave në të cilat pretendohet nga Prokuroria se është kryer ngjarja. Po ashtu, e kundërta ka të bëjë me veprën, sepse është vepër kallëzimi i rremë që është maksimumi 5 vite burgim, pra mund të dënohet me gjobë ose burgim. Ajo se ç’ka ne kemi paraqitur gjatë gjithë periudhës së gjykimit, por sidomos dje që bëmë dhe një pasqyrim të të gjithë procesit ka të bëjë me faktin që asnjë nga dyshimet e prokurorisë, sepse prova realisht prokuroria nuk ka, pra asnjë nga dyshimet e prokurorisë nuk mundet që të shkojë në favor të akuzës. Kjo është e gjithë situata, për çdo provë që është në dosje ne kemi argumentuar të kundërtën, po me provat e prokurorisë dhe kjo vihet re sidomos me dëshminë e Fredi Alizotit, sepse e gjithë dëshmia mbështetet te dëshmia e Fredi Aliztotit.
Gazetarja: Po, ai ka një akuzë konkrete që thotë se më janë premtuar 200 mijë euro?
Avokati: Po, dhe jep edhe momentin se si ka kryer audio-përgjimin duke qenë ky në rolin e Agron Geron Xhafës. Gjithë dëshminë e tij ne me prova shkencore, me tabulate, me aktin e ekspertimit dhe me deklarimet e vet tij, sepse ka shumë kundërthënie në deklarimet si dëshmitar dhe njëkohësisht si i pandehur, kemi rrëzuar dje gjithë akuzën e prokurorisë, por gjykata çuditërisht pasi kaluan rreth katër orë e gjysmë konkluzionet përfundimtare nga gjithë avokatët, për 25 minuta erdhi dhe lexoi një vendim të shkruar në 6 faqe, është vendim i përmbledhur, sepse vendimi i arsyetuar i plotë nuk ka dalë ende, por kjo ishte e gjithë situata.
Gazetarja: Cilat janë hapat që do të ndiqni në vazhdim?
Avokati: Patjetër ne do bëjmë një ankim në gjykatën e Apelit si fillim dhe sigurisht presim që gjykata e Apelit që është dhe me 3 gjyqtarë, është më e vështira e cila do të vihet në presionin e vetingut apo në kapje politike siç u vu gjykata e Shkallës Parë apo dhe Prokuroria. Presim një gjykim më normal dhe një gjykim të drejtë në gjykatën e apelit. Ne normalisht kemi dhe një sërë vendimesh të ndërmjetme që janë rrëzuar përgjatë procesit gjyqësor në shkallën e parë, një pjesë e të cilave kanë të bëjnë edhe me kërkesën për përjashtim që kemi bërë për gjyqtarin e çështjes, kërkesa që nuk janë gjykuar dhe janë konsideruar që s’duhet të gjykohen nga kolegë në gjykatën e Shkallës Parë për të cilët kemi bërë akuzë në gjykatë të lartë, por Gjykata e Lartë për shkak të mos funksionimit nuk është shprehur. Pra ky proces ka dy mundësi për ne, ose pafajësi në gjykatën e Apelit ose çështja do të kthehet patjetër për gjykim sërish në gjykatën e Shkallës së Parë në mënyrë që të behët dhe të kemi një proces të rregullt ligjor.
Gazetarja: Pra, deri atëherë zoti Salianji do të jetë në gjendje të lirë?
Avokati: Po patjetër, është në gjendje të lirë, konsiderohet i pafajshëm deri në momentin që nuk ka një vendim të formës së prerë.
/Boldnews.al/
