Edhe pse shumë banorë të prekur nga tërmeti i 26 nëntorit kanë denoncuar me zë dhe me figurë se ende nuk kanë gjetur një zgjidhje nga qeveria apo të marrin ndihma, kreu i qeverisë Edi Rama e ka nisur fjalën nga Kuvendi duke i thurur lavde qeverisë së tij.
Mënyrën sesi e ka menaxhuar qeveria situatën pas tërmetit tragjik e ka cilësuar këtë si “kapërcim epokal” duke bërë të ditura dhe disa shifra.
“Dëshiroj të shpreh dhe njëherë ndjenjën e krenarisë sime për qeverinë që unë drejtoj dhe për shumicën tonë qeverisëse, për gjithë ministrat dhe deputetët e kryetarët e bashkive të angazhuar në vijën e parë në përballimin e pasojave tragjike të tërmetit shkatërrimtar. Nuk e di nëse dikush e kishte imagjinuar se qeveria do arrinte të bënte atë që bëri.
Në kushtet e një befasie të jashtëzakonshme kur mijëra njerëz u gjendën në rrugë, pa strehë. Në Shqipëri ka pasur fatkeqësi natyrore shumë të lehta dhe njerëzit janë kalbur rrugëve nëpër cadra, janë harruar. Në më pak se 10 ditë mbi 13 mijë persona, janë akomoduar në kushte që kurrë më parë nuk i ka patur nje banor i Shqipërisë në fatkeqësi natyrore.
Mbi 4 mijë persona, janë akomoduar në hotele luksi me të gjitha shërbimet si të ishin turistët gjermanë apo norvegjezë të ardhur në Shqipëri, plus me përkujdesjen shëndetësore e vijimin normal të jetës. 3452 familje kanë marrë qeranë për tu akomoduar në kushte shtëpie sipas zgjedhjes së tyre. Për 6178 persona në fshat që me të drejtë e kanë të vështirë të lëvizin nga trualli i shtëpisë është garantuar përkujdesja për cadrat dimërore.
Vlerësimi i dëmeve vazhdon instensivisht, mbi 97 mijë objekte të inspektuara, janë shembur 56 objekte, 49 në Durrës, 4 në Tiranë, 3 në Lezhë.
Kapërcim epokal nga ana e adresimit të shtetit të nevojave të njerëzve të goditur nga fatkeqësia natyrore”, tha Rama.
