Gjyqtarja Iliriana Olldashi është kallëzuar penalisht nga katër anëtarë të grupit kriminal “Bajri”.
Më konkretisht nga Safet Bajri, Ilir Bajri, Ismet Idrizi dhe Asmer Bilali të cilët kanë depozituar ditën sotme kallëzim penal ndaj gjyqtares Iliriana Olldashi, për veprën penale të “Shpërdorimit të detyrës” parashikuar nga Neni 248 i Kodit Penal.
Ata pretendojnë se edhe pse kanë kaluar 3 javë ende nuk është zbardhur vendimi për ta duke hedhur dyshime se po mundohen t’i mbajnë me çdokusht në burg.
Më herët prokuroria për Krime të Rënda kërkoi zgjatjen e afateve të hetimit për grupin “Bajri”. Për këtë katër anëtarët e grupit “Bajri” iu drejtuan KPK më një kërkesë ankimore ndaj gjyqtares së cështjes dhe prokurorit Anton Martini duke kërkuar largimin e tyre nga sistemi i drejtësisë pasi sipas tyre ishin të ndikuar nga faktorë politikë.
11 anëtarë të grupit “Bajri” në Shkodër u arrestuan brenda një viti në sajë të operacionit të koduar “Oaz”. Ata akuzohen për një sërë veprash të rënda penale: kanosje, gjobvënie të paligjshme, vrasje, trafik droge, pastrim parash, etj.
Grupi “Bajri’’ njihet si një prej strukturave më të rrezikshme kriminale në Shkodër dhe jashtë saj. Konfliktet me grupin tjetër “Lici” kanë prodhuar një numër të madh viktimash.
