Deputetja Rudina Hajdari shprehu këtë të hënë qëndrimin kundër paketës anti-shpifje të qeverisë, një ligj që synon të censurojë dhe kontrollojë median.
Ajo i kërkoi qeverisë të tërheqë paketën.
Në një deklaratë nga kryesia e Kuvendit, Hajdari tha se Rama vazhdon të sulmojë të gjithë aktorët kontrollues dhe kritikues ndaj tij, duke përfshirë këtu dhe median.
“Teksa opozitën e ka kthyer në spektator tashmë, i ka shpallur luftë medias, me këtë paketë tenton të mbysë demokracinë në vend”, tha Hajdari.
“Mos të shkojmë në një Putinizëm apo Erdoganizëm, apo Ramizën të Shqipërisë, siç kërkon të bëjë Rama sot”, deklaroi ajo.
Paketa e qeverisë ka hasur kundërshti nga gazetarët, opozita, OSBE, organizata të medias në vend, por edhe të huaja, ndërsa Komisioni i Ligjeve e ka miratuar këtë të hënë në parim. Paketa pritet të kalojë për votim në parlament në seancën e 19 Dhjetorit.
