Tre shtetas nga Shqipëria kanë vrarë me armë zjarri policin e Malit të Zi Millutin Lekoviq, në Igalo, në afërsi të qytetit Herceg Novi, raportuan mediat lokale.
Sipas të njëjtave burime, tre shtetasin që fillimisht nuk kanë pasur me vete dokumenta identifikues kanë deklaruar se janë nga Kosova. Nga raporti i policisë malazeze, mësohet se Luan Hasanaj 43 vjec është autor i vrasjes së policit 41-vjeçar Millutin Lekoviç, ndërsa në momentin e ndalimit të tyre kanë qenë edhe dy shtetas të tjerë nga Shqipëria, Lulëzim Hasanaj 49 vjeç dhe Nure Hasanaj 67 vjeçe.
Në momentin e ndalimit, ata kanë deklaruar se nuk posedojnë me vete mjete identifikimi dhe se janë nga Kosova. Të tre janë ulur në pjesën e pasme të mjetit të policisë dhe gjatë shoqërimit të tyre në Komisariatin e Policisë së Herceg Novit, Luan Hasanaj ka nxjerrë nga një qese të cilën e mbante në dorë armën e zjarrit dhe ka qëlluar në kokë policin 41-vjeçar Millutin Lekoviç, i cili ka ndërruar jetë në spitalin e Risanit.
Raportohet se Hasanaj është i kërkuar nga autoritetet shqiptare për “tentativë vrasje e kryer në bashkëpunim”.
Pasi ka qëlluar efektivin që është pjesë e policisë kufitare të Malit të Zi, Luan Hasanaj së bashku me Lulëzim Hasanaj dhe Nure Hasanaj janë larguar ndërsa janë arrestuar pas një shkëmbimi zjarri me policinë malazeze teksat të tre tentuan të kalonin në Kroaci në vendin e quajtuar Fusha e Sutorinit. Gjithashtu, gjatë shkëmbimit të zjarrit është plagosur në dorë Hasanaj.
Tre shtetasit shqiptarë janë arrestuar ditën e diel rreth orës 17:00, ndërsa ngjarja ka ndodhur rreth orës 14:00 në Igalo të Malit të Zi, rreth 5 km larg kufirit kroat.
