Ditët e fundit ka hapur një debat të gjerë paketa antishpifje kundra medias online në vendin tonë. Gazetarë, shoqëri civile, OSBE dhe organizata ndërkombëtare janë shprehur kundra asaj se çfarë kryeministri Rama ka në mendje të bëjë, pasi cënon lirinë e medias dhe ka si synim censurën.
Lidhur me këtë ka reaguar dhe Unioni i Gazetarëve Shqiptarë, e cila i dërgoi një thirrje të fortë qeverisë shqiptare që t’a tërheqë këtë paketë.
Në një reagimi në “Facebook”, UGSH e sheh projektligjin si një akt të paprecedentë që po kryhet.
Sipas UGSH, etika dhe e drejta e përgjigjes ndaj një akuze janë të përcaktuara fare mirë në kodet e etikës dhe nuk është e nevojshme që këtë gjë ta marrin në dorë AMA dhe AKEP.
Reagimi i plotë i Unionit të Gazetarëve Shqiptarë:
Unioni i Gazetareve Shqiptare bashkohet ne thirrjen: Qeveri terhiq projektligjet e “Paketes Antishpifje”! Gazetarët shqiptarë, mediat shqiptare, organizatat e medias dhe ato të shoqërisë civile i bëjnë thirrje qeverisë të tërheqë menjëherë dhe pa negociata dy projektligjet e prezantuara si “Paketa Antishpifje”; i bëjnë thirrje Qeverisë që të tërheqë urgjentisht këto projektligje.
Organizatat vërejnë se dy projektligjet, ai për transformimin e AMA-s në një agjenci censure, dhe të AKEP-it në një agjenci përmbarimore për vendimet censuruese të AMA-s, përbëjnë një akt të paprecedent në botën demokratike.
Çështjet e etikës, të tilla si e drejta e përgjigjes ndaj një akuze, apo e drejta e dhënies së fjalës para publikimit të një akuze, në çdo vend demokratik trajtohen nga kodet e etikës dhe organet vetërregulluese të medias.
Çështje të luftës hibride, dizinformimit, financimit me para të pista të medias apo partive politike nga politika apo krimi i organizuar janë të tilla që duhet të hetohen nga organet ligjzbatuese në përputhje me ligjet dhe garancitë që ofrohen nga ligjet ekzistuese, të tilla si kodi penal apo kodi i procedurës penale.
Shqipëria ka ligje që rregullojnë çështjet kur media shkel të drejtat e të tjerëve dhe çdo ndërhyrje tjetër, përfshirë krijimin e një organi administrativ është krejtësisht i panevojshëm në një shoqëri demokratike. Çështjet e shpifjes dhe fyerjes në Republikën e Shqipërisë dhe në çdo vend ku sundon shteti i së drejtës duhet të shqyrtohen vetëm dhe vetëm në gjykata si pushtet i pavarur.
Tentativa për të zëvendësuar gjykatat me organe drejtpërsëdrejti në varësi të pushtetit politik përbën bazë për shkelje të rënda të të drejtave themelore të njeriut dhe mund të transformohet në një gur themeli për një regjim diktatorial.
