Një 33-vjeçar shqiptar është gjetur i pajetë, në mes të fshatit Gadime dhe Kishnapole në Komunën e Lipjanit. Ai rezultonte i zhdukur prej 3 ditësh dhe nuk kishte pasur asnjë kontakt me familjen.
Mediat kosovare shkruajnë se 33-vjeçari me inicialet SH.B., ishte nga Ferizaj.
Gjithashtu, sipas njoftimit zyrtar bëhet me dije se në lidhje me këtë ngjarje është vënë në pranga një person, për të cilin është dhënë masa e ndalimit prej 48 orësh. Ende nuk dihen shkaqet që mund të kenë çuar të dyshuarin të vrasë të riun shqiptar, por hetimet vazhdojnë.
Trupi i pajetë i viktimës është dërguar në Institutin e Mjekësisë Ligjore në Prishtinë për obduksion. Prej tre ditësh, familjarët e tij kishin bërë një denoncim për zhdukjen e 33-vjeçarit.
Njoftimi i policisë
Lidhur me rastin e raportuar me dt.09.12.2019 , Person i zhdukur, pas hetimeve intenzive, hetuesit rajonal kanë arritur që sot rreth orës 19:00 të gjejnë trupin e pajetë të viktimës SH.B. (m/shqiptar) 33 vjeçar nga Ferizaj. Në vendin e ngjarjes kanë dalë njësitet policore si dhe ekipi mjekësor i mjekësisë ligjore .
Pas hetimeve fillestare, hetuesit policor kanë arrestuar një person të dyshuar lidhur me këtë rast dhe ndaj tij, me urdhër të prokurorit është marrë masa e ndalimit prej 48 orësh. Në vendin e ngjarjes ka dalë edhe Prokurori i Shtetit dhe me urdhër të tij trupi i pajetë i viktimës është dërguar në Institutin e Mjekësisë Ligjore në Prishtinë për obduksion. Janë duke vazhduar hetimet për zbardhjen e rrethanave të rastit.
