Presidenti Ilir Meta ka dekretuar aktin normativ me fuqinë e ligjit, për dhurimin e apartamenteve të prekurve nga tërmeti i 26 nëntorit.
‘Shpalljen e ligjit nr. 80/2019 ‘Për miratimin e aktit normativ, me fuqinë e ligjit, nr. 6, datë 30.11.2019, të Këshillit të Ministrave, ‘Për dhurimin e apartamenteve familjarëve të viktimave, si pasojë e tërmetit të datës 26.11.2019’, thuhet në njoftimin e shpërndarë nga presidenca.
Në kuadër të shpalljes së gjendjes së fatkeqësisë natyrore në qarqet Durrës Tiranë dhe Lezhë me vendimin nr.750, datë 27.11.2019, të Këshillit të Ministrave, “Për shpalljen e gjendjes së fatkeqësisë natyrore në qarqet Durrës dhe Tiranë”, i ndryshuar, si pasojë e dëmeve të shkaktuara nga tërmeti i datës 26.11.2019, familjeve të viktimave do t’u vihet në ndihmë nëpërmjet dhurimit të 17 apartamenteve në pronësi të Bashkisë Tiranë, të ndodhura në njësinë administrative nr.1, Tiranë, dhe njësitë e vetëqeverisjes vendore do të dhurojnë në favor të familjarëve të viktimave edhe apartamente nga fondi publik i banesave sociale, të përfituara sipas legjislacionit për strehimin social.
Ky akt normativ është parashikuar në kuadër të masave ligjore të ndërmarra nga qeveria për të shmangur pasojat e ardhura nga tërmeti për familjarët e viktimave të cilët humbën jetën gjatë tërmetit të datës 26.11.2019, të cilët kanë pësuar dëmtime në banesat e tyre.
Miratimi i këtij akti normativ është diktuar në kuadër të masave që po merr qeveria për t’u ardhur në ndihmë familjarëve të viktimave të cilët humbën jetën gjatë tërmetit të datës 26.11.2019 dhe banesat e tyre pësuan dëmtime të cilat e bëjnë të pamundur vijimësinë e jetës në këto kushte. Ky akt normativ synon të minimizojë pasojat e tërmetit duke i siguruar familjarëve të viktimave banesa të cilat do të dhurohen nga njësitë e vetëqeverisjes vendore.
Kështu Bashkia Tiranë do të dhurojë 17 apartamente familjarëve të viktimave, apartamente të cilat janë në pronësi të kësaj bashkie. Për të krijuar mundësinë e një strehimi sa më të shpejtë në kushtet e situatës emergjente të krijuar nga tërmeti i datës 26.11.2019, në këtë akt normativ është parashikuar përjashtimi nga parashikimi i ligjit nr.111/2018, “Për kadastrën”, dhe Agjencia Shtetërore e Kadastrës kryen fillimisht regjistrimin e apartamenteve që do të dhurohen në regjistrat e pasurive të paluajtshme në emër të Bashkisë Tiranë dhe më pas kryen veprimet e nevojshme për kalimin e regjistrimin e tyre në pronësi të familjarëve të viktimave të shkaktuara nga tërmeti i datës 26.11.2019.
Procedura e dhurimit të këtyre apartamenteve do të realizohet nëpërmjet kontratës së dhurimit, sipas parashikimeve të Kodit Civil, si dhe duke ndjekur procedurat përkatëse në ligjin nr.139/2015, “Për vetëqeverisjen vendore”, ku këshilli bashkiak do të japë pëlqimin për dhurimin e pronave të bashkive sipas këtij akti normativ.
