Lidhur me padinë e presidentit Meta ndaj kreut të Këshillit të Emërimeve në Drejtësi, Ardian Dvorani, Prokuroria e Tiranës ka thirrur ditën e sotme dhe Avokaten e Popullit, Erinda Ballanca
Ballanca pritet të pyetet jo vetëm për pretendimet e ngritura nga Presidenca në adresë të Dvoranit, por edhe për vetë pretendimet e institucionit që drejton Ballanca, të cilat i bëri të ditura nëpërmjet një njoftimi në faqen zyrtare të Avokatit të Popullit, pas kallëzimit të Metës.
Avokati i Popullit publikoi pak kohë më parë një raport të gjatë mbi veprimtarinë e KED, ku shpjegon se ka përgatitur edhe një padi ndaj KED dhe kryetarit të saj Ardian Dvorani.
Në raport theksohej se gjatë hartimit të rregulloreve të funksionimit të KED u konstatua një përpjekje për të kufizuar kompetencat ligjore të institucionit të Avokatit të Popullit për të marrë pjesë në mbledhje, duke “parashikuar një kufizim të mëtejshëm të transparencës së Këshillit”
Gjatë ditës së nesërme, Prokuroria ka thirrur anëtaren e Gjykatës Kushtetuese, Vitore Tusha.