KLP vendosi këtë të enjte transferimin e prokurorëve të Krimeve të Rënda dhe atyre të Apelit të Krimeve të Rënda, pasi kjo strukturë hetimore do të shkrihet me krijimin e SPAK. Për të folur për temën, në studion e “Euronews Albania”, ishte i ftuar avokati i njohur Ledio Braho.
Braho e quajti antikushtetuese krijimin e SPAK me dy prokurorë të komanduar.
“Kushtetuta nëse ka një gjë të përcaktuar në lidhje me SPAK, është fakti që duhet të ketë së paku 10 prokurorë. Dhe KLP kur shpalli vakancën aplikuan 22 kandidatë, por ajo ç’ka bëri KLP është që pikëzoi 15 prej tyre. Nga këta jo të gjithë e kaluan vetingun. Një pjesë edhe pse ka që në shtator të vitit 2018 që ka nisur vetingu për kandidatët për SPAK në mënyrë të përshpejtuar ka ende kandidatë që nuk janë përfshirë në shkallën e parë të vetingut. Ndërkohë që ka disa të tjerë që janë konfirmuan në shkallë të parë, por ka ankimuar Komisioneri Publik. Dhe për këtë arsye janë vetëm 8 që janë të konfirmuar me vendim të formës së prerë. Ajo ç’ka orienton KLP është që dy të prej tyre të jenë të komanduar në mënyrë që të bëhet me 10 anëtarë. Por, këtu ka probleme për sa i përket përfitimit të personalitetit juridik nga SPAK-u. Është e vërtetë që Shqipërisë i duhet shumë SPAK-u sot, është struktura që nga reforma në drejtësi supozohet që do bëjë çmos për të çrrënjosur korrupsionin në nivelet e larta qeverisëse, në prokurori, por e vërteta është që s’duhet të nisë me shkelje kushtetuese siç edhe po nis”.
Avokati Braho deklaroi se pritshmërie për SPAK-un janë të larta, ndërsa shtoi se shpresa për profesionalizmin e prokurorëve, që vijnë të gjithë nga Krimet e Rënda, lidhet me trajnimin që do marrin nga SHBA dhe partnerët e tjerë ndërkombëtarë. Në efektshmërinë e SPAK-ut, tha ai, shumë e rëndësishme është dhe Byroja Kombëtare e Hetimit, që ende s’është krijuar.
A do ta përballojë SPAK fluksin e dosjeve që do kalojë nga Prokuroria e Krimeve të Rënda? Avokati është i mendimit se meqë në hetime do përfshihen edhe 60 oficerë të policisë gjyqësore që do jenë pjesë e Byrosë Kombëtare të Hetimit, fluksi mund të përballohet.
