Nga Boldnews.al
Një konflikt i ashpër për pushtet në Vlorë është zhvendosur në dyert e Prokurorisë, ku zyrtarë të “Rilindjes” kallëzojnë njëri-tjetrin për “mëkate” të kryera gjatë detyrës.
I pari që e “pësoi” ishte Egon Velaj, ish-drejtues i ALUIZNI-t dhe së fundmi ish-drejtor i Burgut të Vlorës, i cili u dënua me 6 muaj burg, i konvertuar në shërbim prove, për “shpërdorim detyre” gjatë procedurave të ALUIZNI-t.
Si bazë për identifikimin e përgjegjësisë ligjore të Velajt ka shërbyer, ndër të tjera, edhe një raport i hartuar nga Drejtoria e Planifikimit Urban në Bashkinë e Vlorës, e drejtuar nga Erion Amataj.
Pikërisht, kundër këtij të fundit, Velaj ka depozituar një kallëzim penal në Dhjetor 2018, në të cilin kërkonte hetimin e zyrtarit të lartë të Bashkisë së drejtuar nga Dritan Leli, për “shpërdorim detyre”.
Në kallëzimin e tij, Egon Velaj deklaronte se Erion Amataj ka dhënë një leje ndërtimi për shtetasin A.Ç., dhe se kjo leje cënonte të drejtën e tij të pronësisë. Në vijim të hetimit, Prokuroria e Vlorës ka konstatuar se Amataj, Drejtor i Planifikimit Urban të Bashkisë së qytetit, ka shpërdoruar detyrën.
Për këtë arsye, prokurori i çështjes, Albert Kuliçi, i ka njoftuar shtetasit Erion Amataj mbylljen e hetimit, në bazë të të cilit e akuzon për “Shpërdorim detyre”, sipas nenit 248 të Kodit Penal.
“Boldnews.al” ka siguruar në mënyrë ekskluzive aktin e “Njoftimit të Mbylljes së hetimeve”, të Prokurorisë së Vlorës, në të cilën gjenden detajet e plota të hetimit të zhvilluar ndaj drejtuesit të lartë lokal.
Kallëzimi
Në Dhjetor 2018, shtetasi Egon Velaj ka dorëzuar një kallëzim penal në Policinë e Vlorës, ku pretendon se një leje ndërtimi që Bashkia e Vlorës i ka dhënë shtetasit A.Ç., i cënon banesën e tij. Këtij kallëzimi i janë bashkuar edhe deklarimet e dy personave të tjerë, kufitarë në pronën që po zhvillohej, Eduart Hoxha e Robert Demaj.
Pas referimit të veprës penale, Prokuroria e Vlorës zhvilloi hetime, në përfundim të të cilave konkludoi se Erion Amataj, me detyrë Drejtor i Planifikimit Urban në Bashkinë e Vlorës ka “shpërdoruar detyrën”.
Sipas hetimeve të Prokurorisë, rezulton se Amataj, me një vendim të konfirmuar nga kryebashkiaku Dritan Leli, ka miratuar lejen e ndërtimit të një kati shtesë mbi një godinë ekzistuese në pronësi të shtetasit A.Ç.
Kjo leje, pas kryerjes së ekspertizës dhe komunikimit ndër-institucional, rezulton se është dhënë në kundërshtim me ligjin.
Kështu, pas një kërkese paraprake të Bashkisë së Vlorës për aplikimin për leje ndërtimi nga shtetasi A.Ç, ndërmarrja e Ujësjellës-Kanalizimeve të qytetit ka shprehur qëndrimin kundër. Në vlerësimin e Ujësjellësit, A.Ç. nuk mund të pajisej me leje ndërtimi “shtesë kati”, pasi ai nuk kishte një kontratë me këtë ndërmarrje për ujin e konsumuar për godinën ekzistuese.
Nga ana tjetër, për një hetim më të plotë, Prokuroria e Vlorës ka urdhëruar kryerjen e një ekspertize në terren, për të identifikuar nëse qëndron pretendimi i kallëzuesit Velaj.
Në përfundim, ekspertja e caktuar nga Prokuroria konkludoi se leja e ndërtimit cënonte pronën/banesën e personave që ishin ankimuar, pasi nuk ishin respektuar largësitë minimale për ndërtimet.
Bazuar në aktet e ekspertimit, si edhe në qëndrimin zyrtar të Ujësjellës-Kanalizime, i cili sugjeronte mos-dhënien e lejes së ndërtimit për shtetasin A.Ç., Prokuroria arriti në konkluzionin se shtetasi Erion Amataj, me funksion Drejtor i Planifikimit Urban në Bashkinë e Vlorës ka konsumuar elementët e veprës penale “Shpërdorim detyre”.
Në vijim, në datë 25 Nëntor 2019, prokurori i çështjes i ka njoftuar mbylljen e hetimeve zyrtarit Erion Amataj.
