Trafikantët përpiqen të dënojnë denoncuesit. Kështu u shpreh nënkryetari i PD-së, Edmond Spaho, pas dhënies së pretencës nga prokurori Kol Hysenaj, lidhur me atë që njihet si dosja e Geron Xhafajt, i cili po vuan dënimin me burg në Itali, pas publikimit të video-përgjimit.
Prokuroria kërkoi sot 3.6 vjet burg për Albert Veliun dhe 3 vjet burg për Fredi Alizotin, si dhe dënimin me 3 vite shërbim prove për ish-deputetin Ervin Salianji. Gjithashtu prokurori ka kërkuar edhe dënimin e gazetarit, Jetmir Olldashi.
Spaho theksoi se prokurori Hysenaj është një shërbëtor besnik i Edi Ramës dhe mendon të kalojë vettingun duke luftuar drejtuesit e PD.
Sipas nënkryetarit të PD-së, me gjyqin e sotëm shqiptarët panë se si trafikantët, mafia në bashkëpunim me politikën po përpiqen të dënojnë denoncuesit.
“Sot rezultoi se viktima kryesore e këtyre hetimeve paska qenë Xhafaj.
Konkluzionin e konfirmoi edhe avokati i tij. Akuzë e mbrojtur nga prokurori politik, Hysenaj, shërbëtor besnik i mazhoranxcës që mendon të kalojë vettingun duke luftuar ashpër PD dhe drejtuesit e saj.
Kjo prokurori do duhet të kishte përfunduar hetimin se si u larguan Geron Xhafaj brenda 24 orëve në Itali?
Të kishte hetuar ekspertizës që bëri kryeministri dhe deklaroi se ishte regjistrim falso?
Me gjyqin e sotëm pamë se si trafikantët, mafia na bashkëpunim me përpiqen të dënojnë denoncuesit. Ata që sakrifikojnë edhe interesin personal në interes të vendit dhe të kësaj shoqërie”, tha Spaho.
