Liverpooli dhe Napoli do të kërkojnë të sigurojnë kualifikimin për në fazën e eliminimit direkt të 1/16, respektivisht ndaj Salzburgut dhe Genk.
Llogaritë në grupin E janë të hapura, ku Liverpool e udhëheq grupin me 10 pikë, ndjekur nga Napoli me 9 dhe Red Bull Salzburg me 7 pikë. Në vend të fundit renditet Genk me vetëm 1 pikë.
Skuadra e Salzburgut ka qenë një nga surprizat këtë sezon, duke zhvilluar disa ndeshje mjaft të mira në Champions. Aktualisht të tretët në këtë grup të ngjeshur, austriakët akoma e kanë fatin në duart e tyre përpara ndeshjes me Liverpool.
Nga ana tjetër “Të Kuqtë”, tjetër janë shfaqur në Premier Ligë ku dominojnë totalisht dhe tjetër në Champions, teksa pavarësisht që kryesojnë grupin, nuk kanë arritur të shfaqin cilësitë e tyre më të mira në kompeticionin ku shpresojnë të mbrojnë kurorën.
Skuadra e Liverpool me një fitore ndaj Salzburg përveç kualifikimit do të siguronte dhe vendin e parë, ndërsa edhe me barazimin do të kualifikohej por vendi i parë me gjasa do t’i kalonte Napolit, të cilët në teori kanë një ndeshje të lehtë ndaj Genk, skuadër që nuk ka arritur asnjë fitore dhe numëron vetëm 1 pikë.
