Luhen sot 5 takime të cilat hapin javën e 16-të të Premier Ligës angleze.
Takimi ku do të jenë sytë jo vetëm në Angli, por në të gjithë Europën, është padyshim ai mes Manchester City-t dhe Manchester United.
Për herë të parë në vitet e fundit , të dyja skuadrat vijnë poshtë pritshmërive për standardet e tyre, ku kampionët në fuqi të City-t, këtë sezon nuk janë në formën optimale, kjo shihet dhe në tabelën e klasifikimit, ku e shohin veten plot 11 pikë larg Liverpool-it kryesues, ndërsa situata për United është edhe më “gri” pasi prej viteve “djajtë” nuk janë kompetivë aq sa duhet për të rivalizuar për titullin kampion.
Gjithsesi të dyja skuadrat vijnë pas fitoreve respektive të tyre, ku ekipi i Guardiolës mposhti Burnley-n me rezultatin 1-4 në transfertë, ndërsa United pati një ndeshje të vështirë ndaj Tottenham, ku doli triumfuese, 2-1.
Në lidhje me derbin dy trajnerët kanë dalë në konferencë për shtyp, ku Guardiola ka deklaruar:
“Është Manchester United. Respektoj atë çfarë ato kanë bërë për futbollin Anglez dhe atë Europian. United kanë histori të madhe dhe cilësia e tyre është gjithmonë aty por do të përpiqemi t’i mundim. Luajmë ndaj një skuadre të mirë por jam optimist për fitoren”.
Ndërsa Ole Gunnar Solskjaer, tregon për memoriet e derbit që ai vetë ka luajtur ndaj City-t:
“U deshën shumë vite përpara se të luaja një derbi të Manchesterit vetë. Sigurisht, Manchester City është një skuadër më e mirë tani sesa në kohën kur luaja unë. Besoj se djemtë do të jenë gati për këtë ndeshje . Kemi 24 orë më pak pushim se kundërshtarët por kjo nuk do të ndikojë, adrenalina që kjo ndeshje të jep mbulon shumë gjëra”.
United do të kërkojë fitoren për të vazhduar ngjitjen në tabelën e klasifikimit ndërsa rivalët e City-t nuk duan të shohin një shkëputje të mëtejshme të Liverpool.
