Vështirësitë e Atletico Madrid këtë sezon vazhdojnë, djemtë e Simeones u ndalën në një barazim pa gola në transfertën e Villareal.
Ishte ndeshja e katërt radhazi në të gjitha kompeticionet që Atletico nuk fiton ku në tre nga ato ndeshje nuk ka shënuar asnjë gol.
Pjesa e parë kishte një rast të rëndësishëm për të dy formacionet: e nisi Joao Felix inkursioni i të cilit përfundoi me goditjen e stampuar në shtyllë, pa tronditur rezultatin e ndeshjes. Villarreal u përgjigj me Trigueros, por i përhershmi Oblak shpëtoi situatën për Simeone.
Pas rifillimit Atletico vazhdoi të provonte, me Joao Felix më aktivin ndër Colhoneros, por as talenti e veprimet e tij, nuk arrijnë të prishin ekuilibrin e kësaj sfide. Mundësia e fundit ishte pikërisht në këmbët e portugezit, që nuk gjeti dot kuadratin e kështu Atletico Madrid vijon të ketë paqartësi e luhatje forme, që japin mungesë sigurie mbi kondicionin e tyre.
Me këto rezultate negative, mediat spanjolle por dhe tifozët e Atletico, sytë i kanë drejtuar tek trajneri Simeone, pasi ky i fundit duket se e ka humbur kontrollin absolut që dikur kishte në skuadër.
Atletico Madrid aktualisht ndodhet në pozicionin e gjashtë në tabelën e klasifikimit me 26 pikë në 16 ndeshje të zhvilluara.
