Nga Boldnews.al
Ministrja e Arsimit deklaroi paraditen e së Mërkurës se mësimi në Tiranë dhe Durrës do të fillojë në 9 Dhjetor, saktësisht në datën që u njoftua në një profil në rrjetet sociale me emrin “Besa Shahini”, i konsideruar “Fake” prej saj pak ditë më parë.
Në 29 Nëntor 2019, ministrja Shahini reagoi “energjikisht” kundër një statusi të konsideruar “FAKE” prej saj, në të cilin njoftohej se “Pezullohet njoftimi deri në dt.09.12.2019 në qarqet Tiranë dhe Durrës”.
Ky njoftim ishte bërë nga një profil në rrjetet sociale me emrin ‘Besa Shahini” dhe me një foto të saj, identike me atë që ministrja e Arsimit përdor për komunikimin me publikun.
Nëpërmjet profilit të saj zyrtar, Shahini njoftoi mbrëmjen e 29 Nëntor: “Nxënës, mësues dhe prindër të dashur! Njoftimin zyrtar për rifillimin e mësimit do ta bëj pasi të mbyllim të gjithë analizat e vlerësimeve të infrastrukturave shkollore. Ndaj, MOS MERRNI në konsideratë LAJMET “FAKE”, si kjo këtu…!
Statusin në rrjete sociale të datës 29 Nëntor 2019, ministrja Shahini e shoqëron me foton e “njoftimit” të publikuar në emër të saj, të cilin e konsideronte “FAKE”.
Ndoshta është rastësi, por “njoftimi FAKE” i datës 29 Nëntor 2019 përkoi saktësisht me njoftimin që dha paraditen e së Mërkurës ministrja Shahini-mësimi në Tiranë dhe Durrës fillon në datën 9 Dhjetor.
Profili i konsideruar “FAKE” nga ministrja Shahini me atë “zyrtarin” e përdorur prej saj, kanë ngjashmëri të shumta.
Rrjetet sociale, sidomos ato me përhapje globale, janë në përgjithësi strikt për të mos lejuar dublikimin e profileve me të njëjtët emra, madje edhe me të njëjtat foto, siç është edhe rasti i profilit të konsideruar ‘FAKE” nga Besa Shahini.
Për më tepër, gjithnjë sipas fotos “FAKE”, profili, megjithëse i konsideruar i rremë, duket se paska shumë ndjekës (rreth 1100 klikime në 10 minuta dhe shumë komente mbi “njoftimin” e shpërndarë).
Po ashtu, njoftimi “FAKE” përmbante të dhëna normale për një situatë anormale sizmike, ndaj është disi e pakuptueshme përse dikush, anonim, ka preferuar të bëjë një “shaka të hidhur” me emrin e ministres së Arsimit.
Gjithësesi, duke mbajtur në konsideratë qëndrimin e ministres së Arsimit se ai njoftim ishte “FAKE”, nga ana tjetër mund të mos përjashtohet edhe mundësia që njoftimi i datës 29 Nëntor të jetë një veprim “i nxituar” i Shahinit, e pakoordinuar me drejtuesit e Qeverisë.
Në ditën e njoftimi “FAKE”, pra në 29 Nëntor 2019, kryeministri Edi Rama kishte në qendër të ligjërimit të tij publik pikërisht sulmin ndaj mediave që përhapnin, sipas tij, “informacione FAKE” për tërmetin.
Në këtë frymë, publikimi i një informacioni zyrtar se mësimi do të fillonte pas 10 ditësh (“njoftimi” i datës 29 Nëntor për rifillimin e mësimit në 9 Dhjetor), do të konfirmonte se pasojat e tërmetit dhe sidomos pas-lëkundjet, ishin ende shqetësim.
Duke ndjekur këtë vijë logjikë, nëse Shahini ka publikuar njoftimin e datës 29 Nëntor, atë që më pas e quajti ‘FAKE” për shtyrjen e mësimit me 10 ditë, atëherë me shumë mundësi ka pasur një reagim të fortë nga zyrtarët e lartë qeveritarë për të “sqaruar” situatën dhe për të deklaruar në publik se informacioni është i rremë.
Ministrja Besa Shahini e mohoi atë status ‘FAKE”, por, gjithësesi, vendimi i saj më i fundit është i njëjtë me atë të profilit të “rremë”-mësimi në Tiranë dhe Durrës do të nisë në 9 Dhjetor.
